Halyq sanaǵynyń saýaldaryna qazaqstandyqtardyń 39,6 protsenti onlain rejimde jaýap berdi. Bul týraly Ulttyq statistika biýrosynyń basshysy Nurbolat Aidapkelov málimdedi, dep habarlaidy QazAqparat.
«16 qazannan bastap sanaq saýaldaryna onlain rejimde jaýap berý fýnktsiiasy toqtatyldy. 45 kún ishinde halqymyzdyń 40 protsentke (39,6% nemese 7527458 adam) jýyǵy sanaqtan ótýdiń osy jolyn tańdady. Al bizdiń interviýerler 3 million 792 myńnan asa adammen saýalnama júrgizgen. Osylaisha, sanaqtan ótkender úlesi 60 protsentke jetti», - dedi biýro basshysy.
Onlain sanaqtan ótpegender qazannyń 30-yna deiin úilerdi aralaityn interviýerlerdiń kómegimen sharaǵa qatysa alady.
Onlain ótkender tiisti habarlamany interviýerlerge kórsetýi tiis. Olarǵa saýalnama qaita júrgizilmeidi.
Sanaqshylarda Halyq sanaǵynyń logotipi bederlengen kók tústi sharf pen sómke, plansheti jáne sanaq qyzmetkeri ekenin rastaityn kýáligi bolady.
Ol kýáliktegi tirkeý nómiri arqyly interviýer týraly málimetterdi sanaq.gov.kz saitynda tekserý múmkindigi bar.
Odan bólek, 1446 nómirine habarlasýǵa bolady. Bailanys ortalyǵy táýlik boiy jumys isteidi.
«Halyq sanaǵy elimiz úshin asa mańyzdy shara. Sondyqtan oǵan bir kisidei barshamyz jumylyp at salysýymyz qajet. Interviýerler de el azamattary ekenin umytpaiyq. Eńbegin baǵalap, qurmet kórsetip, túsinistik tanytýlaryńyzdy suraimyz», - dep atap ótti Nurbolat Aidapkelov.
Aita keteiik, sanaqtyń negizgi kezeńi aiaqtalǵan soń, qarashanyń 1-7 aralyǵynda sanaq ótkizý ádistemesine sáikes, baqylaý aralaý qarastyrylǵan.
Bul kezeńde shamamen 10 protsent respondent qamtylady.
