Elimizde internet arqyly aldanyp jatqan azamattar óte kóp. Bul týraly halyqqa esep berý kezdesýinde QR Ishki ister ministri Erlan Turǵymbaev aitty, dep habarlaidy QazAqparat.
«Koronavirýs pandemiiasyna bailanysty internet salasyndaǵy qylmystar artty. Onlain-qyzmetterdiń damýyna orai internetpen jasalatyn alaiaqtyq 2 ese kóbeidi. Mundai qylmystardyń saldarynan azamattarǵa 67 mln teńge shyǵyn keldi. Osyǵan bailanysty, Ishki ister ministrligi Kiberqylmyspen kúres ortalyǵynyń jumysyn kúsheitti. Tek osy qylmystardy ashatyn arnaiy toptar quryldy. Jaýapkershilikke 450 adam tartyldy», - dedi ministr.
Erlan Turǵymbaev ózge memlekettermen qarym-qatynas jasap, alaiaqtarmen kúresý úshin tyǵyz jumys istep jatqandyqtaryn aitady.
«Óitkeni shetelde júrip, azamattardy aldaityndar kóbeidi. Osy jyldyń ózinde Resei, Belarýs, Ýkraina elderinen Qazaqstan azamattaryn aldaǵan 3 myńǵa jýyq fakti tirkeldi. Ókinishke orai, internet arqyly aldanyp jatqan azamattar óte kóp. Kúndelikti telearna men gazetterde, áleýmettik jelilerde saqtyq sharalary týraly materialdar berilýde. Onlain-saýda jasaý kezinde azamattar abai bolýy qajettigin eskertemiz. Qazir Ulttyq bankpen jáne ekinshi deńgeili banktermen tyǵyz qarym-qatynas ornatyp, azamattardyń jeke múlkin qorǵaý úshin qadamdar jasalýda», - dedi ol.
