Foto: el.kz
Qazaqstandyqtar Túrkiiada zardap shekkenderge 18 mln teńgege jýyq qarajat jinady. Bul qarajatqa 40-qa jýyq kiiz úi alyp, Túrkiianyń Qazaqstandaǵy Bas konsýldyǵyna jetkizý josparlanýda, dep habarlaidy QazAqparat.
Bul bastamany jýrnalist Nurbek Bekbaý kótergen, ony belgili qazaqstandyq ánshi Sáken Maiǵaziev qoldady. Osylaisha, 7 aqpannan bastap qarajat jinaý bastaldy jáne shamamen 18 mln teńge jinaldy.
«Bul qarajat shamamen 40 kiiz úi satyp alýǵa jetkilikti. Bizdiń jigitter Almatynyń shetinde ornalasqan kiiz úi tsehymen kelisti. Sertifikatty, kiiz úilerdiń sapasyn tekseremiz. Bortqa júkteý úshin arnaiy qujattar qajet eken. Biz qazir kiiz úi satyp alýǵa bara jatyrmyz. Kamazǵa tiep, Qazaqstandaǵy Túrkiianyń Bas konsýldyǵyna aparamyz. Túrkiia biligimen kiiz úilerdi tezirek jetkizý úshin kelissózder júrgizilýde», - dedi N. Bekbaý QazAqparat tilshisine bergen suhbatynda.
Sonymen birge ol shatyr jetkizýge bolatyn kezde nege kiiz úi alyp jatqanyn túsindirdi.
«Biz kiiz úidi jaidan-jai tańdamadyq. Birinshiden, shatyrda tek 5-6 kún turasyz, al kiiz úide uzaq ýaqyt ómir súre alasyz. Kilem men kórpe tóseseńiz, kiiz úi jaily úige ainalady. Ekinshiden, kórip otyrǵanyńyzdai, Túrkiiada úiler qirap jatyr. Eger biz shatyr ornatsaq, tóbeden qulaǵan bir tas shatyrdy zaqymdaýy múmkin, al kiiz úi ońailyqpen zaqymdalmaidy. Kiiz úidiń psihikalyq, psihologiialyq mańyzy da bar. Túrikter Qazaqstandy «Atajurt» dep ataidy, óitkeni Qazaqstan aýmaǵy – barlyq túrkilerdiń, onyń ishinde qazirgi túrikterdiń ata-babalarynyń otany. Biz Túrkiiadaǵy baýyrlarymyzǵa árqashan kómek kórsetetinimizdi jáne yntymaqty kórsetkimiz keledi», - dedi Nurbek Bekbaý.
Ázirge bastamashylar qarajat jinaýdy toqtatqan joq. Satyp alynǵan kiiz úiler Túrkiianyń Qazaqstandaǵy Bas konsýldyǵyna tapsyrylady. Nurbektiń aitýynsha, Qazaqstandaǵy Túrkiia elshiliginiń áýejaida óz qoimasy bar. Onda kiiz úiler sertifikatqa tekserilip, Túrkiiaǵa jiberiledi.
Aita keteiik, Túrkiiadaǵy jer silkinisinen qaza bolǵandar sany 12,3 myńnan asty, 62 914 adam jaraqat aldy. Halyqty ornalastyrý úshin 70 818 shatyr tigilgen.
