Qazaqstanda 9 qazan kúni «Qaiyrymdy ister marafony» jalpyulttyq jobasy aiasynda uiymdastyrylǵan Qaiyrymdylyq kúni merekesi ótkizilýde, dep habarlaidy QazAqparat.
Mereke tujyrymdamasyna sai elimizdiń ár óńirinde offlain nemese onlain formatta «izgilik keńesteri» bar stend ornalastyrylǵan, kez kelgen adam ondaǵy kartochkany alyp, kórsetilgen qaiyrymdy isti jasap, ol jóninde áleýmettik jelilerde Marafonnyń resmi paraqshasyn belgilep jáne tegtei otyryp bólise alady.
Aktsiiany Almaty, Atyraý, Qostanai, Pavlodar jáne Aqtóbe oblystarynda offlain rejimde qoldady.
Taldyqorǵan qalasyndaǵy «Atameken» SÚ-de «Qaiyrymdylyq júregi» installiatsiiasyn ornatty. Búginde installiatsiiadan 120-dan astam «izgilik keńesteri» oryndaldy, al jańa kartochkalar qajettilikke bailanysty paida bolady.
Oblys ákimdigi ókilderiniń aitýynsha, aldaǵy ýaqytta «Qaiyrymdylyq júregin» adamdar kóp shoǵyrlanatyn túrli jerlerge kóshirý josparlanyp otyr.
Aqtóbede «izgilik keńesteri» stendin ornatýdan bólek, «Jas saqshy» eriktiler toby Ulttyq qaiyrymdylyq kúnin merekeleýge orai oblystyq jastar resýrstyq ortalyǵynyń qoldaýymen stýdentter arasynda voleibol týrnirin ótkizýge bastamashylyq etti. Is-shara sheńberinde qaiyrymdylyqtan túsken barlyq qarajat múmkindigi shekteýli adamdarǵa arnalǵan «Alash» qoǵamdyq uiymynyń tóraǵasy Álibek Nurbaiulynyń emdelýine beriledi.
Al Pavlodar qalasynda 9 qazan kúni «Batyr Mall» SÚ-de Ulttyq qaiyrymdylyq kúnine orai aktsiia ótkiziledi. Bul kúni qala turǵyndaryn jaqsylyq jasap aktsiiany qoldaýǵa shaqyrady: qan tapsyrý, panasyz janýarlardy tamaqtandyrý, qoǵamdyq kólikte oryn berý jáne t.b.
Ulttyq qaiyrymdylyq kúnin merekeleýge qatysqysy keletin qostanailyqtar «Jastar saraiyna» bara alady: onda izgilik keńesteri bar installiatsiia ornatylǵan, kez kelgen adam ondaǵy kartochkany alyp, kórsetilgen qaiyrymdy isti jasap, ol jóninde áleýmettik jelilerde Marafonnyń resmi paraqshasyn belgilep jáne tegtei otyryp bólise alady.
Aktsiiany Qazaqstannyń barlyq óńirinde onlain-formatta qoldady: jeli qoldanýshylary @qaiyrymdy_ister_marafony resmi akkaýntynan tabýǵa bolatyn «izgilik keńesteri» bar AR-maskasyn belsendi paidalanady.
Eske sala keteiik, «Qaiyrymdy ister marafony» jalpyulttyq jobasy osy jyldyń aqpan aiynda Memleket basshysy Qasym-Jomart Toqaevtyń bastamasymen Qazaqstan Táýelsizdiginiń 30 jyldyǵyn merekeleý sheńberinde bastalǵan bolatyn. Joba Azamattyq bastamalardy qoldaý ortalyǵy men QR Aqparat jáne qoǵamdyq damý ministrliginiń qoldaýymen júzege asyrylýda.
