Amerikadaǵy The World's Best talanttar baiqaýy qazylar alqasynyń qazaqstandyq múshesi Gaýhar Nurtas óziniń Instagram akkaýntynda Qazaqstan turǵyndarynyń Dimash Qudaibergenniń án aitqanyn qashan jáne qai jerden kórýge bolatyny, sondai-aq baiqaýda ol úshin qalai daýys bere alatyny jaiynda jazdy, dep habarlaidy QazAqparat tilshisi.
«Sársenbi, 6 aqpan, Los-Andjeles ýaqytymen saǵat 20:00-de The World's Best talanttar baiqaýynyń ekinshi epizody bastalady. AQSh-tan tys eldegi jankúierler, Instagram jáne You tube-ta meniń live kórsetilimime qosylyńyzdar», - dep jazdy Gaýhar Nurtas.
Budan basqa, ol epizodtyń súiiktisi úshin @theworldsbestcbs-tyń Twitter-degi resmi paraqshasynda onlain arqyly daýys berýge bolatynyn habarlady.
Eske sala keteiik, Qazaqstannyń atynan bul baiqaýǵa eki oryndaýshy - Dimash Qudaibergen men Daneliia Tóleshova qatysyp otyr. 1 million dollar kólemindegi syiaqy jáne «Álemniń úzdigi» ataǵy úshin álemniń úzdik qatysýshylary dodaǵa túsedi.
Budan bólek, QR Mádeniet jáne aqparat ministri Arystanbek Muhamediulynyń málimetinshe, qazirgi kezde Dimash Qudaibergenniń AQSh-ta jeke kontsertin ótkizý máselesi boiynsha kelissózder júrgizilýde.
«Qazirgi jobamyz - Dimashtyń Amerikada jeke kontsertin uiymdastyryp berý. Biraq biz onyń burynnan da úlken shoý bolǵanyn, onyń Niý-Iorktyń úlken zalynda, múmkin, «Medison-skver-gardenda» ótkenin qalaimyz», - dedi Arystanbek Muhamediuly.
