Memlekettik qyzmetterdi úide otyryp I jáne II toptaǵy múgedekter, 70 jastan asqan qarttar, Uly Otan soǵysynyń qatysýshylary men múgedektigi bar balalar ala alady, dep habarlaidy "Ult aqparat" «Azamattarǵa arnalǵan úkimet» korporatsiiasyna silteme jasap.
Ol úshin olardyń ózi nemese qamqorshylary 1414 qysqa nómirine qońyraý shalyp, ótinish qaldyrýy kerek. Budan keiin «Azamattarǵa arnalǵan úkimet» memlekettik korporatsiiasynyń mamandary olarǵa habarlasyp, úilerine baryp memlekettik qyzmetti kórsetý kúni men ýaqytyn belgileidi.
Biylǵy 5 aida Azamattarǵa arnalǵan úkimettiń filialdary turǵyndardyń úiine baryp, 15 myńǵa jýyq memlekettik qyzmet kórsetti.
«Azamattarǵa arnalǵan úkimet» memlekettik korporatsiiasynyń basqarma tóraiymy Ásemgúl Baltashevanyń aitýynsha, úi-úige baryp memlekettik qyzmet kórsetý – korporatsiia qurylǵan sátten bastap paida bolǵan qyzmet jáne osy kúnge deiin ol ózektiligin joǵaltqan emes. «Azamattardyń úilerine baryp kórsetiletin eń tanymal qyzmetter – pasporttar men jeke kýálikterdi berý, múgedekterdi sýrdo-tiflotehnikalyq jáne mindetti gigiena quraldarymen qamtamasyz etý, múgedekterdi protezdik-ortopediialyq kómekpen qamtamasyz etý úshin qujattaryn rásimdeý», – dedi Baltasheva.
Ol sondai-aq Almaty qalasy, Jambyl jáne Qyzylorda oblystarynda mobildi toptardyń jii shaqyrylatynyn aitty. Eń siregi – Batys Qazaqstan oblysynda.
Memlekettik korporatsiia qyzmetkerleri koronavirýs pandemiiasyn eskere otyryp, qyzmet kórsetý barysynda barlyq qaýipsizdik sharalaryn saqtaidy. Barlyq maman maskalarmen jáne antiseptiktermen jabdyqtalǵan. Qyzmet alýshylarmen bailanysty azaitý úshin HQO mamandary dálizden ary ótpei, áleýmettik qashyqtyqty saqtaidy.
Aita ketý kerek, «Azamattarǵa arnalǵan úkimet» memlekettik korporatsiiasy múgedekterge memlekettik qyzmet kórsetý jumysyna kóp kóńil bóledi. Azamattardyń úilerine baryp memlekettik qyzmet kórsetýmen qatar, HQO mamandary estý jáne sóileý qabileti nashar adamdarǵa memlekettik qyzmetterdi kórsetý úshin ym-ishara tilin meńgergen.
Sondai-aq, múgedektigi bar 807 azamat memlekettik korporatsiia men onyń filialdarynda túrli laýazymdarda jumys isteidi.
