Biylǵy oqý jylynyń basynan beri qazaqstandyq joǵary oqý oryndarynda 300-den astam jańa bilim berý baǵdarlamasy engizildi, dep habarlaidy "Ult aqparat" Bilim jáne ǵylym miinistrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, atalmysh baǵdarlamalar eńbek naryǵyndaǵy zamanaýi suranystar men jumys berýshilerdiń mamandarǵa qoiatyn talaptaryna sáikes beiimdelip, ázirlengen.
Jańa oqý baǵdarlamalary boiynsha bolashaq injenerlerdi, qurylysshylar men pedagogterdi, menedjerlerdi, ekonomister men zańgerlerdi jáne basqa da mamandardy oqytady. Máselen, «Iadrolyq meditsina», «Smart City tehnologiialary», «Matematikalyq ekonomika, statistika jáne derekterdi taldaý», «Bilim berýdegi fizika», «Ǵylymi tarih», «New media», «Taý-ken isindegi 3D modeldeý injeneri», «Nanomaterialdar jáne nanotehnologiialar» men basqa da jańa baǵdarlamalar boiynsha.
Budan basqa, IT-mamandarǵa degen suranystyń artýyna bailanysty aqparattyq-kommýnikatsiialyq tehnologiialar (AKT) salasynda da jańa bilim berý baǵdarlamalary engizildi. Jańa oqý jylynan bastap ýniversitetter «Big Data Analysis» (aýqymdy derekterdi taldaý), «Jasandy intellekt tehnologiiasy», «Kriptologiia», «IT-quqyq», «Digital Engineering», «Robototehnikalyq júieler», «Data Science», «Kiberfizikalyq júieler», «Robottandyrylǵan pilotsyz ushý apparattary», «IT-menedjment», «Tsifrlyq ekonomika» siiaqty baǵdarlamalar boiynsha myńdaǵan bolashaq baǵdarlamashylardy oqytady.
Aita keteiik, 2021 jyly AKT salasyndaǵy mamandardy daiarlaýǵa 10 myńǵa jýyq grant bólindi, bul 2018 jylmen salystyrǵanda eki ese kóp.
«Sońǵy jyldary Qazaqstannyń eńbek naryǵynda IT-mamandarǵa suranystyń kúrt ósýi baiqalady. Búgingi tańda aqparattyq tehnologiialar ómirdiń barlyq salasyna engizilgen. Joǵary oqý oryndary mamandarǵa qoiylatyn qazirgi talaptarǵa sáikes keletin bilim berý baǵdarlamalaryn ázirledi. Bilim berý baǵdarlamalaryn engizý barysynda joǵary oqý oryndary jumys berýshilerdiń pikirleri men suranystaryn eskerdi. Mysaly, jumys berýshiler aqparattyq júielerdi qorǵaý boiynsha kadrlar daiarlaý qajettiligi týraly habarlady. Jańa baǵdarlamalardyń basty artyqshylyǵy — olar eńbek naryǵynda qajet praktikalyq bilim alýǵa baǵyttalǵan. IT baǵyty boiynsha kóp jańa baǵdarlama bar. Máselen, IT-quqyq, IT-meditsina», — dedi QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
Sonymen qatar JOO-lar IT-kompaniialarmen — bolashaq jumys berýshilerimen yntymaqtastyq ornatýda. Dýaldi oqytý belsendi túrde engizilip jatyr, stýdentter oqý ýaqytynyń 40%-yn kásiporyndarda ótkizedi. Óz kezeginde stýdentter jańa bilim berý baǵdarlamalaryna oń baǵa berip, olardy ázirleý kezinde praktikalyq bilimge basa nazar aýdarylǵanyn atap ótti.
Aita keteiik, barlyq jańa bilim berý baǵdarlamasy joǵary jáne joǵary oqý ornynan keiingi bilim berý baǵdarlamalarynyń tizilimine engizilgen.
Esterińizge sala keteiik, buǵan deiin QR BǴM qazaqstandyq joǵary oqý oryndarynyń bilim berý qyzmetine qoiylatyn talaptardy ózgertken bolatyn. Jańashyldyqtar mamandyqtarǵa bailanysty engizilip, joǵary bilimniń tájiribege baǵyttalýyn kúsheitýge baǵyttalǵan. Joǵary oqý oryndary jumysqa tájiribeli mamandardy tartýǵa múmkindik aldy.
