Belgili zańger Jangeldi Súleimanov Qazaqstan jaily syńarjaq málimdemelerimen tanylǵan reseilik jýrnalist Tigran Keosaiandy sotqa berdi, dep habarlaidy Ulysmedia.kz.
Zańgerdiń pikirinshe, Keosaian qazaqtardyń namysyna tietin sózderi úshin zań aldynda jaýap berýi kerek.
"Keosaian búkil halqymyzdyń namysyna tidi, ol sózsiz. Bul istegi ustanymy úshin SIM-ge rahmet.
Biraq qazaqtar da jaýap berýi kerek. Zańǵa sáikes, jaýap berýshi sheteldik azamat bolsa da, mundai ister boiynsha Qazaqstan sotyna aryzdanýǵa bolady.
Keshe men Almaty qalasy, Almaly aýdandyq sotyna osyndai shaǵym túsirdim. Sottan suraitynym tek bir nárse. Keosaian aitqan sózin teriske shyǵaryp, iýtýb arnasyna jańa video jariialasyn. Odan basqa eshteńe qajet emes", - dep jazdy zańger Facebook-tegi paraqshasynda.
Eske sala keteiik, jelide reseilik telejúrgizýshi Tigran Keosaiannyń Qazaqstanǵa ses kórsete sóilegen videosy taraǵan edi. Ol "Ýkrainaǵa qarap, jaqsylap oilanyńdar, oń-soldaryńdy durystap tanyńdar" degen maǵynada ún qatqan bolatyn.
Kóp uzamai Qazaqstan Syrtqy ister ministrligi reseilik jýrnalistiń daýly málimdemesine qatysty pikir bildirgen edi.
Elimizge ses kórsetken Keosaian jýyrda taǵy da shýly málimdeme jasap, qandai da bir shekteýlerge qaramastan, Qazaqstanǵa keletinin aitty.
