15 jastaǵy qazaqstandyq qyzdy senimdi ókili Túrkiiadaǵy Antaliianyń áýejaiynda qaldyryp ketken, dep habarlaidy "Ult aqparat".
Belgili bolǵandai, atalǵan senimdi ókil qyzdyń ákesimen azamattyq nekede eken. Olar Túrkiiadan Qazaqstanǵa attanar aldynda jetkinshektiń pasporty joǵalǵany anyqtaldy.
QR Syrtqy ister ministrliginiń baspasóz qyzmeti bul oqiǵaǵa qatysty túsinikteme berdi.
«Qazaqstannyń Túrkiiadaǵy konsýly qyz balamen bailanysqa shyqty. Osy oraida bul másele baqylaýǵa alynǵanyn habarlaimyz», - delingen ministrlik málimetinde.
Óz kezeginde qyzdyń anasy Asyl bul oqiǵanyń mán-jaiyn aityp berdi.
«Meniń balam burynǵy kúieýimniń otbasymen Túrkiiada demalýǵa barǵan edi. Osy oraida senimhat burynǵy kúieýimniń zaiybyna jazylǵan edi, sebebi olar bir kún buryn (5-inen 6 tamyzǵa qaraǵan túni) saparlaýǵa tiis edi. Al qyzymnyń ákesi eki kúnnen keiin Túrkiiaǵa barmaqshy boldy. Sondyqtan senimhatty berip, bala aman-esen jetti. Al Qazaqstanǵa shyǵar kezde, elge orala almai qaldy. Saǵat 10:30 kezinde maǵan habarlasyp, áýejaida qalǵanyn aitty. Ógei anasy balanyń tólqujatyn joǵaltyp alǵan. Qujattyń joǵalǵanyn balaǵa áýejaiǵa bara jatqan jolda aitqan. Burynǵy kúieýimniń zaiyby Qazaqstanǵa kele jatyr, al balam Túrkiiada qalyp qoidy», - dedi qyzdyń anasy.
Qyzdyń ákesi qazirgi kezde Túrkiiada oqshaýlaýǵa jatqyzylǵan. Ushaqqa barardyń aldynda PTR-test nátijesinde odan koronavirýs anyqtalǵan.
«Senimhat kúieýimniń qazirgi áieline jazylǵan bolatyn. Ol ózine jaýapkershilikti alýy kerek edi. Ol balany osylai qaldyryp ketýge quqyly emes. Qyzymnyń ákesimen bailanysqa shyǵa almai jatyrmyn», - dedi balanyń anasy.
