2020 jyldyń jazynda FlyArystan qalalar arasynda qatynaityn áýe reisteriniń sanyn eki esege arttyrady. Biletterdiń baǵasy 8999 teńgeden bastalady, dep habarlaidy "Ult aqparat".
Qazaqstandaǵy alǵashqy loýkoster - FlyArystan Almaty men Nur-Sultannan jańa áýe baǵyttaryn ashýdy, sondai-aq suranysy joǵary reisterdiń sanyn arttyrýdy josparlaýda.
Máselen, «Almaty-Qostanai-Almaty» jańa baǵyty 12 naýryzdan bastap kúndelikti oryndalatyn bolady. Osy baǵyttaǵy eń arzan tarif quny 8999 teńgeden bastalady. Al Almatydan Aqtóbege jáne de keri qarai ushaqtar 20 sáýirden aptasyna 3 ret qatynaidy. Biletter baǵasy 11 999 teńgeden joǵary.
Al biylǵy jazdan bastap kelesi reisterdiń sany artatyn bolady:
- «Almaty-Shymkent-Almaty», reister sany 86% artyp, aptasyna 13 reiske deiin kóbeidi;
- «Almaty-Pavlodar-Almaty», reisterdiń sany 43% artyp, aptasyna 10 ret oryndalady.
- «Almaty-Nur-Sultan-Almaty», kúnine 2 ret oryndalǵan reister 50% artyp, kúnine 3 ret qatynaityn bolady.
- «Almaty-Qaraǵandy-Almaty», reisterdiń sany 29% artyp, aptasyna 9 ret oryndalady.
Aǵymdaǵy jylǵy 25 qazanǵa deiin oryndalatyn reisterge biletterdi kompaniia saitynan búginnen satyp alýǵa bolady.
Eske salaiyq, birneshe kún buryn atalmysh aviakompaniia Almaty men Nur-Sultannan Qyzylordaǵa, sonymen qatar biylǵy naýryz aiynda elordadan Petropavl men Kókshetaý qalalaryna jańa reister ashatyny habarlandy.
