QR BǴM Ulttyq biotehnologiia ortalyǵynyń ǵalymdary tereń jaralar men kúiikterdi emdeýge arnalǵan birneshe innovatsiialyq qural ázirledi, dep habarlaidy QazAqparat.
QR BǴM Ulttyq biotehnologiia ortalyǵynyń ǵalymdary tereń jaralar men kúiikterdi emdeýge arnalǵan birneshe innovatsiialyq qural ázirledi. Olardyń biri – X-Graft biologiialyq jabyny. Ol klinikalyq zertteýlerden ótip, kóp uzamai Qazaqstan Respýblikasynda tirkeledi. Zertteý nátijeleri atalǵan biologiialyq materialdy qoldaný jarany emdeý protsesin edáýir tezdetetinin kórsetti. Sonymen qatar naýqastardyń aýrýhanada emdelý kezeńin qysqartady.
«Ortalyq ǵalymdary ázirlegen X-Graft jabyny zamanaýi injenerlik tehnologiialar kómegimen kollagen jáne elastin talshyqtarynan jasalǵan. Tańý materialy tereń jáne uzaq ýaqyt emdelmeitin jaralarǵa arnalǵan, sonymen qatar trofikalyq jaralardy ýaqytsha tańý úshin qoldanylady. Jabyn qoldanysta yńǵaily, dáke tańǵyshpen salystyrǵanda jaranyń betine jabyspaidy. Emdik qasietteri boiynsha atalǵan biologiialyq jabyn sheteldik analogtardan kem túspeidi jáne beriktigi joǵary, ikemdi ári absorbtsiiaǵa ie», – dedi QR BǴM Ulttyq biotehnologiia ortalyǵynyń bas direktory Erlan Ramanqulov.
Sondai-aq Ulttyq biotehnologiia ortalyǵynyń ǵalymdary tereń jaralar men kúiikterdi emdeýge arnalǵan «Fibrosprei» jasýshalyq preparatyn oilap tapty. Aerozol adamnyń teri jasýshalarynyń (fibroblasttar) sýspenziiasynan turady jáne jaranyń saýyǵý protsesin eki ese jyldamdatady. Sonymen qatar klinikalyq tájiribede bul preparat teri transplantatsiialaryn tezdetý úshin qoldanylady.
Ortalyq ǵalymdary sonymen qatar baǵanaly jasýshalardy qoldaný arqyly kúrdeli synyqtar men zaqymdalǵan tize býyndaryn qalpyna keltirý tehnologiiasyn jasady. Klinikaǵa deiingi synaqtardyń nátijeleri boiynsha biokompozitti jasýshalyq gidrogel joǵary tiimdiligin kórsetti. Gidrogeldiń quramyndaǵy baǵanaly jasýshalar súiek nemese shemirshek tinderiniń qalpyna kelý protsesin tezdetedi. Arnaiy tehnologiianyń arqasynda preparat operatsiiadan keiin úsh-alty ai ishinde zaqymdalǵan súiek pen shemirshek tinin qalpyna keltiredi.
