Armiia halyqaralyq oiyndary aiaqtalýǵa jaqyn. Qazaqstandyq áskeri qyzmetshiler 11 konkýrsqa qatysty. Onyń 2-ýi el aýmaǵynda ótti, dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
Ushqyshsyz ushý apparattarynyń eseptoptary arasyndaǵy «Suńqar ańshylyǵy» konkýrsynda Qazaqstan komandasy bultaryssyz jeńiske jetti. Ekinshi oryndy – Belarýs, úshinshi oryndy – Resei enshiledi.
«Artilleriiadan oq atý sheberleri» – bul minaatqysh bólimshelerdiń jarysy. Qazaqstan jaýyngerleri tabandy kúreste negizgi qarsylasy – reseilik áskeri qyzmetshilerden basyp ozyp birinshi oryn aldy. Úshinshi oryn Ázerbaijanǵa buiyrdy.
Budan ózge, el Qarýly Kúshteriniń áskeri qyzmetshileri birqatar saiystardan júldeli oryndar aldy. Aita ketsek, «Desant vzvody» konkýrsynda reseilik desantshylarǵa ǵana ese jiberip, ekinshi orynǵa taban tiredi.
Qazaqstan sondai-aq, «Taktikalyq mergen», «Attar marafony», «Beibitshilik jaýyngeri», «Tártip saqshysy», «Elbrýs sheńberi», «Teńiz kýbogy» jáne «Armiia mádenieti» konkýrstarynda «qola» júlde iegeri atandy.
Armiia halyqaralyq oiyndaryna qatysýshy áskeri qyzmetshiler Otannan jyraqta júrse de, Jambyl oblysynda oryn alǵan órt kezinde búkil elmen birge qaiǵyrǵanyn birneshe ret atap ótti. Armiia oiyndaryndaǵy ózderiniń joǵary jetistikterin qaza tapqandardyń rýhyna arnaidy.
Armiia halyqaralyq oiyndarynyń jabylý rásimi kúni «Tank biatlony» konkýrsynyń aqtyq saiysy ótedi. Onda Ázerbaijannyń, Qazaqstannyń, Qytai jáne Reseidiń tank ekipajdary baǵyn synaidy.
