«Úzdik ǵylymi qyzmetker — 2021» syilyǵynyń qorytyndysy belgili boldy, dep habarlaidy QazAqparat Bilim jáne ǵylym ministrligine silteme jasap.
Ǵylymi-zertteý institýttary men joǵary oqý oryndarynyń 50 ǵalymy jeńimpaz atandy. Olardyń árqaisysy 2 000 AEK, iaǵni 5 mln 834 myń teńge kóleminde kýálik pen syiaqy alady.
El Prezidenti Q.K. Toqaev ǵalymdardy qoldaýǵa erekshe kóńil bóledi. Memleket basshysynyń tapsyrmasy boiynsha biyl 500-ge jýyq ǵalymnyń ǵylymi taǵylymdamadan ótýine stipendiia taǵaiyndaldy, sonymen qatar postdoktorantýra úshin jas ǵalymdarǵa 1000 grant bólindi. Prezident tarapynan ǵalymdardy qoldaýdyń kezekti sharasy jyl saiynǵy «Úzdik ǵylymi qyzmetker» syilyǵyn taǵaiyndaý boldy. Ol ǵylym men tehnikanyń damýyna eleýli úles qosqan ǵalymdardy, ǵylymi qyzmetkerlerdi qoldaýǵa baǵyttalǵan.
«Memleket basshysynyń tapsyrmasy boiynsha Bilim jáne ǵylym ministrligi ǵalymdar men ǵylymi uiymdardyń, joǵary jáne joǵary oqý ornynan keiingi bilim berý uiymdarynyń qyzmetkerlerin jan-jaqty qoldaý máselelerine nazar aýdarady. Biyl ministrlik alǵash ret elimizdiń úzdik ǵalymdary úshin syiaqy taǵaiyndady. Konkýrsqa qatysýǵa ótinimder osy konkýrs úshin arnaiy qurylǵan jáne avtomatty túrde segiz ólshemshart boiynsha baldary bar aqparattyq júie arqyly qabyldandy. Ǵylymi jetistikterdi baǵalaý kriteriileri ǵylymi jáne saraptamalyq qaýymdastyqpen birge jasaldy. Barlyq qatysýshy ótinim berý kezeńinde óz balyn kóre aldy. Olardy komissiia qarady jáne saraptamalyq toptar usynylǵan qujattardyń bekitilgen kriteriilerge sáikestigin sektsiialarda tekserdi. Komissiia men sarapshylar tobynyń quramynda jetekshi ǵalymdar, táýelsiz sarapshylar, memlekettik organdardyń ókilderi, jas ǵalymdar keńesi men jas ǵalymdar aliansynyń músheleri jumys istedi», — dep atap ótti QR BǴM Ǵylym komitetiniń tóraiymy Janna Qurmanǵalieva.
Konkýrsqa qatysý úshin barlyǵy 7 baǵyt boiynsha 575 ótinim kelip tústi. Olardyń arasynda jaratylystaný ǵylymdary, injiniring jáne tehnologiialar, meditsina jáne densaýlyq saqtaý, áleýmettik jáne gýmanitarlyq ǵylymdar, aýyl sharýashylyǵy jáne veterinariia ǵylymdary, áskeri ǵylymdar jáne Ulttyq qaýipsizdik ǵalymdary boldy. Nátijesinde komissiia 6 ǵylymi zertteý institýttary men 16 joǵary oqý orynynan 50 ǵalymǵa «Úzdik ǵylymi qyzmetker-2021» syilyǵyn berý týraly sheshim qabyldady.
Olardyń arasynda L. N. Gýmilev atyndaǵy Eýraziia ulttyq ýniversitetiniń professory Rahmetqajy Bersimbai, Iadrolyq fizika institýty filialynyń jetekshisi Maksim Zdorovets, Qaraǵandy tehnikalyq ýniversitetiniń professory Aristotel Isaǵulov, Onkologiia jáne radiologiia ǵylymi zertteý institýtynyń basqarma tóraiymy Diliara Qaidarova, Ál-Farabi atyndaǵy Qazaq ulttyq ýniversitetiniń professory PhD doktory Qairat Dáýletov, Qazaq ulttyq agrarlyq zertteý ýniversitetiniń professory Qaisar Tabynov jáne basqalar qatysty.
