Pavlodarlyq 17 jastaǵy stýdent álemde analogy joq tabiǵi kosmetikalyq ónim shyǵarýda. Daiana Mýkinanyń jobasynyń negizgi ereksheligi - kosmetikaǵa sýblimatsiialanǵan bie sútin qosý, dep habarlaidy Pavlodarnews.kz.
Pavlodar oblysynyń daryndy balalarǵa arnalǵan oblystyq kópsalaly litsei-internaty bitirgen ol búgingi tańda Astana IT University oqý ornynyń birinshi kýrsynda bilim alady .
Jas kásipker kofe skraby, betke arnalǵan klinser jáne betke jáne denege arnalǵan gel shyǵarady. Barlyq ónimderdiń negizi - tek tabiǵi jáne paidaly zattar. Kosmetika teriniń barlyq túrlerine jaramdy jáne ony eresekter de, balalar da qoldana alady.
«Bie sútiniń rh jáne adam terisiniń rh óte uqsas. Bul terini qurǵaq nemese maily qylmaidy jáne yńǵaily orta jasaýǵa múmkindik beredi. Sondyqtan kosmetika betinde jańa bórtpeler men pillingtiń paida bolýyna jol bermeidi. Ónim praktikalyq gipoallergendi. Quramynda immýnoglobýlin jáne amin qyshqyldary bar. Saýylmalydan basqa, biz ártúrli mailardy, iaǵni kokos, karit, kakao qosamyz. Olar qosymsha kútim jasaidy, ylǵaldandyrady jáne terini nárleidi. Al bie súti qabyný men qyshýdy jeńildetetip, qurǵaq jáne sezimtal terige názik kútim jasaidy», - deidi Daiana Mýkina.
Jas kásipkerdiń aitýynsha, pandemiiaǵa bailanysty sýblimatsiialanǵan bie sútimen qamtamasyz etetin kompaniia ýaqytsha jumys istemeidi. Sol sebepti satylym ýaqytsha toqtatyldy. Biraq ol kosmetikaǵa qosatyn sýblimatsiialanǵan bie súti qaitadan shyqqan kezde jumysty qaita jandandyratynyn aitady.
«Baǵalar óte qoljetimdi. Mysaly, skrab 550 teńge, betke arnalǵan klinser 500 teńge, al gel 1200 teńge turady. Bastapqydan men kosmetikany biýdjettik baǵamen jasaǵym keldi. Bul ideiam iske asty. Óitkeni qymbat kosmetikany satyp alýǵa kóbiniń jaǵdaiy kele bermeidi. Grantty jeńip alǵannan keiin kóptegen tapsyrystar túse bastady. Bul salada básekelester bar. Alaida, sýblimatsiia qoldanylatyn kosmetikanyń dál osy túrine álemde analogy joq tabiǵi kosmetikalyq ónim bolyp tabylady, - deidi Daiana Mýkina.
