Foto: Oqý-aǵartý ministrligi
Qazaqstanda árbir balanyń turǵylyqty jerine qaramastan sapaly bilim alýyna qolaily, qaýipsiz ári jaily jaǵdai jasaýǵa baǵyttalǵan turaqty memlekettik saiasat júrgizilýde. Sońǵy jyldary iske asyrylyp jatqan aýqymdy memlekettik baǵdarlamalar bul baǵytta eleýli nátijelerge qol jetkizýge yqpal etti, dep habarlaidy Ult.kz Oqý-aǵartý ministrligine silteme jasap.
Jańa mektepterdiń qurylysy jáne modernizatsiialaý
Elde jańa mektepterdiń qurylysy qarqyndy júrgizilýde. Memleket basshysynyń tapsyrmasymen sońǵy tórt jyl boiy jyl saiyn 1000-ǵa jýyq aýyl mektepteri modernizatsiiadan ótýde. Bul sharalar oqý jaǵdailaryn jaqsartýǵa ǵana emes, qala men aýyl mektepteri arasyndaǵy bilim berý sapasyndaǵy alshaqtyqty azaitýǵa da múmkindik beredi. Sońǵy úsh jylda 4000-nan astam mekteptiń materialdyq-tehnikalyq bazasy jańartylyp, 2000-nan astam bilim berý uiymynda robototehnika, himiia, biologiia, fizika jáne STEM boiynsha zamanaýi kabinetter ashyldy. Mysaly, 2024 jyldyń ózinde 967 mektepte 1621 pándik kabinet jabdyqtalǵan. Aldaǵy jospar boiynsha 2029 jylǵa qarai 7000 zamanaýi pándik kabinet ashý kózdelip otyr.
Tsifrlyq tehnologiialardy engizý
Bilim berý sapasyn arttyrýda tsifrlyq tehnologiialardy engizýdiń mańyzy zor. Ulttyq bastamalar aiasynda mektep oqýlyqtarynyń 100%-y tsifrlyq formatqa kóshirildi, al mektepterdiń 95,2%-y joǵary jyldamdyqty internetke qosyldy. Sonymen qatar, bilim berý platformalary engizilip, jasandy intellekt elementteri oqý protsesine integratsiialanýda. Bul sharalar oqýshylardy bolashaqtyń syn-qaterlerine daiyndaýǵa jáne tsifrlyq daǵdylardy erte jastan qalyptastyrýǵa baǵyttalǵan.
Muǵalimderdi qoldaý jáne olardyń mártebesin kóterý
Bilim berý sapasyn arttyrýda pedagogikalyq qaýymdastyqtyń kásibilik deńgeii mańyzdy ról atqarady. Memleket tarapynan muǵalimderdi qoldaý, olardyń mártebesin arttyrý maqsatynda júieli jumystar júrgizilýde. 2020 jyldan beri pedagogterdiń jalaqysy eki ese ósti, al biliktilik sanattary bar muǵalimderge jalaqysynyń 35%-dan 50%-ǵa deiin ústemeaqy tólenýde. Qazirgi ýaqytta 400 myń pedagogtiń 300 myńǵa jýyǵy osyndai qoldaýǵa ie. Aýyl muǵalimderiniń jalaqysy qalalardaǵy áriptesterinen keminde 25%-ǵa joǵary bolýy óńirlerge bilikti kadrlardy tartýǵa septigin tigizýde.
Áleýmettik qoldaý sharalary
2023 jyldyń qyrkúieginen bastap Prezidenttiń tapsyrmasymen barlyq bastaýysh synyp jáne áleýmettik osal toptar sanatyndaǵy oqýshylarǵa tegin ystyq tamaq berý bastaldy. 1,7 million oqýshyny qamtý úshin jergilikti biýdjetterden 192 mlrd teńgeden astam qarajat bólindi. Sonymen qatar, ashana qyzmetkerlerine qoiylatyn talaptar kúsheitilip, tamaq sapasyna kúndelikti baqylaý engizildi.
“Jalpyǵa birdei bilim berý” qory aiasynda áleýmettik osal sanattaǵy 510 myńnan astam oqýshy mektep quraldarymen qamtamasyz etildi. 2025 jyldan bastap jekemenshik mektep oqýshylaryna da áleýmettik qoldaý sharalaryn engizý josparlanýda.
