Foto: Zakon.kz
Energetika ministri Erlan Aqkenjenov Úkimet otyrysynda kómir salasynyń qazirgi jaǵdaiy men damý josparlary týraly baiandady, dep habarlaidy Ult.kz.
Ol Qazaqstannyń kómir ónerkásibi eldiń energetikalyq qaýipsizdigi úshin mańyzdy ekenin atap ótti.
Qazaqstan kómir keniniń qomaqty qoryna ie jáne álemde 10-shy orynda tur, bul óndirýdiń qazirgi kólemimen alǵanda 300 jyldan astam ýaqytqa jetedi.
«Iri kómir ken oryndary Ortalyq Qazaqstannyń eki negizgi aimaǵynda ornalasqan. Olar – Qaraǵandy kómir basseini men Torǵai kómir basseinindegi Shubarkól jáne Jalyn ken oryndary. Soltústik-shyǵys aimaqta Ekibastuz kómir basseini, Maikúbi kómir basseini, Qarajyra ken orny bar. Elimizdegi kómir qorynyń kólemi – 33,6 mlrd tonna», — dedi Erlan Aqkenjenov.
Ministrdiń aitýynsha, 2026 jyly elimizde kómir óndirý kólemi 128,9 mln tonna bolady dep josparlanyp otyr. Bul sala ishki naryqty turaqty qamtamasyz ete otyryp, eksportqa da tasymaldy ulǵaityp, sol arqyly ósim kórsetip otyr.
«Óndiriletin kómirdiń negizgi bóligi ishki naryqqa jiberiledi, ol elektr energetikasynda, kommýnaldyq-turmystyq sektorda jáne ónerkásipte paidalanylady. Kómir eksportynyń da deńgeii saqtalyp otyr», — dep atap ótti Erlan Aqkenjenov.
2025 jyldyń qorytyndysy boiynsha kómir óndirý shamamen 115,9 mln tonnany qurady, bul 2024 jylmen salystyrǵanda 7%-ǵa kóp.
Kommýnaldyq-turmystyq maqsattarǵa jáne ishki tutynýǵa 85,9 mln tonna paidalanyldy, al kómir eksporty 30 mln tonnaǵa jetti.
Kómir eksportynyń negizgi baǵyttary: Resei Federatsiiasy, Polsha, Ózbekstan, Túrkiia, Úndistan, Malaiziia jáne taǵy da basqa elder.
Búgingi tańda qatty paidaly qazbalar salasynda kómir boiynsha 40 jer qoinaýyn paidalanýshy 41 kelisimshart boiynsha qyzmet júrgizýde.
Ministr qazirgi ýaqytta kómir salasyna jańa investitsiialar tartý boiynsha júieli jumys júrgizilip jatqanyn atap ótti.
Jumys baǵdarlamalaryna sáikes 2025 jyly kómir ónerkásibindegi kelisimsharttarǵa salynǵan investitsiialar kólemi 305 mlrd teńgeni qurady, al 2026 jyly salaǵa tartylǵan investitsiia shamamen 553,5 mlrd teńge bolady dep kútilýde.
«Kómir ónerkásibinde 32 myńǵa jýyq adam jumyspen qamtylǵanyn atap ótken jón. Sektordyń turaqty damýy barysynda jumys oryndarynyń sany óse túspek. Ministrlik kómir salasyndaǵy geologiialyq barlaýdy damytýǵa erekshe nazar aýdaryp otyr. Biyl jyl sońyna deiin shamamen 10 ýchaske boiynsha kómir ken oryndaryna jer qoinaýyn paidalaný quqyǵyn berý týraly aýktsion ótkizý josparlanýda», — dedi Erlan Aqkenjenov.
