28-29 qazanda ótetin Digital Bridge-2021 halyqaralyq forým aiasynda dástúr boiynsha eldiń úzdik tehnologiialyq startaptary anyqtalady, dep habarlaidy QazAqparat.
Osy jyly Astana Hub Battle jarysynyń júldelik qory I oryn úshin $10 myń, II orynǵa $5 myń jáne III orynǵa $3 myń quraidy.
Startaptarǵa qatysý úshin qoiylatyn basty sharttar: MVP nemese MVO satysyndaǵy eksportqa shyǵýǵa áleýeti bar joba, komandada kem degende 2 negizgi adamnyń bolýy jáne jobanyń naryqtaǵy tájiribesi 2 jyldan aspaýy tiis.
Astana Hub Battle-2021 barysy qandai?
- Saitta suranym bergen 100 básekege qabiletti joba jartylai finalǵa ótip, 28 qazanda 1-minýttyq prezentatsiiamen Digital Bridge alańynda mamandardyń aldynda sóz sóileidi.
- Qazylar alqasynyń sheshimimen 29 qazanda 10 úzdik joba digitalbridge.kz bas sahnasynda óz jobasy týraly 3-minýttyq prezentatsiiasyn ótkizedi.
- Irikteýdiń eki kezeńiniń nátijelerimen battl júldegerleri anyqtalady.
Astana Hub tehnoparkiniń bas direktory Maǵjan Madievtiń aitýynsha, is-shara birinshiden, Qazaqstandaǵy startap-ekojúiesiniń jańa talanttaryn aiqyndaýǵa jáne jobalar damýdyń jańa deńgeiine kóterilýine qoldaý kórsetý úshin uiymdastyryldy.
«Jyldan jylǵa startaptar arasynda báseke uiymdastyrý arqyly biz birneshe maqsattardy kózdeimiz: ekojúieniń jańa qatysýshylaryn tabý, otandyq startap-mádenietin dáripteý jáne eldegi tehnologiialyq kásipkerlikti damytý»,- deidi Maǵjan Madiev.
Ótken jyldardyń baiqaýlarynyń jeńimpazdary bolyp KidSecurity, Abscrypt, Antidolg, Smart Gas, WebTotem men Kompra atandy, olar búgingi kúni qazaqstandyq IT-naryǵynda sátti damyp, óz ónimderin shetelge eksporttaýda.
