Qazaqstanda bir kúnde koronavirýspen 7035 adam tirkelip, 109 adam qaitys boldy. Bul týraly Densaýlyq saqtaý ministrligi habarlady.
Aýrýǵa shaldyqqandar arasynda 6725 adam virýs juqtyrǵanyn PTR testi arqyly bilgen (KVI+), 310 adamǵa diagnozy aýrý belgileri boiynsha (KVI- nemese "kovidtektes pnevmoniia) qoiylǵan. Qaitys bolǵandar arasynda 16 adamǵa "kovidtektes pnevmoniiasy" diagnozy bolǵan.
KVI+ esebi boiynsha eń kóp naýqas Almatyda anyqtalǵan. Onda bir kúnde koronavirýspen 1613 adam tirkelgen. Qaraǵandy oblysynda 920, Nur-Sultanda 829 adamnyń PTR testi oń nátije kórsetken.
Eldiń epidemiialyq kartasynda Túrkistan oblysynan ózge óńirler áli de "qyzyl aimaqta". Bul indettiń órship turǵanyn bildiredi. "Jasyl aimaqta" jalǵyz turǵan Túrkistan oblysynda ótken táýlikte 65 naýqas tirkelgen.
Bul esep boiynsha indet bastalǵaly 736 906 adam tirkelgen. Resmi statistikada onyń 8302-si qaitys boldy dep kórsetilgen.
Qazaqstan úkimeti "kovidtektes pnevmoniia" esebin byltyr 1 tamyzdan bastap júrgizip keledi. Sodan beri pnevmoniianyń bul túrimen 67 805 naýqas tirkelgen, onyń 4216-sy kóz jumǵan.
Eki esepti qosa alǵanda, elde 27 shildeden beri eń tómengi kórsetkish tirkelip otyr. Sol kúnnen beri koronavirýs kún 7,5-8 myń adamnan anyqtalyp kelgen.
Indettiń keiingi ailarda órshýin koronavirýstyń "delta variantymen" bailanystyrady. Juqpalyǵy joǵary, aýyr halge jyldam túsiretin bul variant alǵash ret Úndistanda anyqtalyp, Qazaqstanda maýsymnyń sońynda tirkelgen.
Mamandar vaktsinalardyń qaýiptirek sanalǵan "delta" variantynan da qorǵaitynyn aitady. Ekpe salýdy 1 aqpanda bastaǵan Qazaqstanda osy kúnge deiin barlyǵy 4 million 995 myń adam vaktsinany tolyq alǵan. Budan bólek 1,3 million adam ekinshi dozany kútip otyr.
Amerikalyq Djons Hopkins ýniversitetiniń málimetinshe, indet bastalǵaly álemde koronavirýspen 211 millionnan astam adam tirkelgen. Onyń 4,4 milliony qaitys bolǵan.
