Ulttyq senim keńesiniń múshesi, BTS Digital bilim jobalarynyń jetekshisi Saiasat Nurbek qazaqstandyq kolledjderde oqytýdyń jańa baǵdarlamasyn engizý jospary týraly aitty, dep habarlaidy QazAqparat.
«Jańa mamandyqtar atlasy búginde óz jemisin bere bastady. Aitar bolsaq, TjKBB daiyndaýda jáne kolledjder men JOO-ǵa arnalǵan jańa oqý baǵdarlamalaryn ázirleýde qoldanyp jatyr». Máselen, Atyraý munai jáne gaz ýniversitetiniń bazasynda biyl alǵash ret munai-gaz jabdyqtaryn prediktivtik taldaý boiynsha bakalavriat baǵdarlamasy iske qosylady. Odan bólek, otandyq 10 kolledj bazasynda buryn múldem bolmaǵan, jańa oqytý baǵdarlamalary iske qosylady», - dedi Saiasat Nurbek Ulttyq keńes múshelerine memlekettik nagradalardy tapsyrý saltanatynyń aldynda tilshilerge suhbat kezinde.
Onyń aitýynsha, mamandyqtar atlasy bilim salasymen qatar, eńbek naryǵynda da suranysqa ie.
«QR Eńbek jáne halyqty áleýmettik qorǵaý ministrligi eńbek naryǵyn uzaq merzimdi boljaý úshin atlasty paidalanyp jaty. Táýelsizdiktiń 30 jylynda biz alǵash ret eńbek naryǵynyń qalai ózgeretini týraly qysqa, orta jáne uzaq merzimdi modelin jasai bastadyq. Eńbek naryǵynda jańa suranystar paida bolyp jatyr, bul óz kezeginde jańa daǵdy men talapty qajet etedi. Bul halyq úshin de, bilim berý jáne eńbekpen qamtý salasy úshin de mańyzdy. Sondai - aq biznes salasyna da naryq suranysyna daiyn bolýǵa qatysty naqty nusqaýlyq beredi», - deidi ol.
