Órt qaýipsizdigine bailanysty 1 myńnan astam nysandy paidalaný toqtatyldy. Bul týraly Májilistegi azamattyq qorǵaý júiesine qatysty Úkimet saǵatynda Tótenshe jaǵdailar ministri Iýrii Ilin málim etti, dep habarlaidy QazAqparat agenttigi.
«Biyl órt sany 8%-ǵa azaidy (2020 j. - 9 420, 2021 j. - 8 662), negizgi memlekettik órt baqylaýyna túsetin salalardaǵy, óndiristik maqsattaǵy, bilim berý jáne densaýlyq saqtaý ǵimarattary men qurylystaryndaǵy, saýda kásiporyndaryndaǵy órtterdiń sany tómendeýinen azaidy. Órttiń negizgi sebepteri: qarapaiym talaptar men órt qaýipsizdigin qamtamasyz etý sharalaryn saqtamaý, aqaýly elektr quraldaryn paidalaný, qaýipsiz júris-turys daǵdylarynyń bolmaýy. Júrgizilgen tekserýler nátijesinde 99 myń tártip buzýshylyq anyqtalǵan (98 655), 16 myńnan astam jeke jáne zańdy tulǵalar ákimshilik jaýapkershilikke tartyldy, 1 myńnan astam nysandy paidalaný toqtatyldy (1 058)», - dedi Iu. Ilin.
Onyń aitýynsha, óńirlerde tsifrlandyrý aiasynda onlain-rejimde ákimshilik hattama jasaýǵa múmkindik beretin «ÁIBT» ákimshilik is júrgizý júiesi josparly túrde engizildi. Tekserýlerdiń ashyqtyǵy men zańdylyǵy úshin inspektorlyq quram portativti beinetirkegishterdi keńinen qoldanady.
«Orman jáne dala tabiǵi órtteri halyq pen óńirler úshin úlken qaýip bolyp otyr. Jyl saiyn orta eseppen elimiz boiynsha 4,5 myńǵa deiin orman ári dala órti bolady, bul rette janý alańy shamamen 100 myń gektardy quraidy. Órtten kelgen shyǵyn jylyna 1,8 milliard teńgeden asady. Sondyqtan óńirlerde tiisti aldyn alý jumystaryn biz júrgizemiz, biraq ol árqashan nátijeli bola bermeidi», - dedi ministr.
Onyń sózine qaraǵanda, orman-dala qoryna irgeles jáne aýdan ortalyqtarynan shalǵaida ornalasqan aýyldy eldi mekenderdi órtten qorǵaý áli nashar kúiinde qalyp otyr. Olarda memlekettik órtke qarsy qyzmet bólimsheleri joq, sondyqtan ákimdikterge órt sóndirý beketterin qurý mindeti júktelgen. Bul «Azamattyq qorǵaý týraly» Zańmen qarastyrylǵan.
