QR Bilim jáne ǵylym ministrligi joǵary oqý ornynyń úzdik oqytýshysyn anyqtaityn bolady, dep habarlaidy "Ult aqparat" vedomstvonyń baspasóz qyzmetine silteme jasap.
«Joǵary oqý ornynyń úzdik oqytýshysy - 2021» respýblikalyq baiqaýyna qatysý úshin qujattardy qabyldaý 1 qarashadan bastalyp, 15 qarashaǵa deiin jalǵasady. Jeńimpaz 6 million teńge shamasynda syiaqy alady.
Baiqaýǵa joǵary oqý oryndarynyń shtattaǵy oqytýshylary qatysa alady. Olardyń úzdiksiz ǵylymi-pedagogikalyq ótili keminde 5 jyl bolyp, oqytýshylyq jáne ǵylymi qyzmette joǵary jetistikteri bolýy tiis.
Baiqaýdyń maqsaty – oqytýshy mamandyǵynyń bedelin arttyrý jáne joǵary oqý oryndary oqytýshylaryn kásibi turǵyda odan ári damýyna yntalandyrý.
Konkýrs 2 kezeńnen turady. Aldymen, joǵary oqý ornynyń ishinde, keiin respýblikalyq deńgeide ótedi. Konkýrsqa qatysý úshin ótinimder men qujattar QR BǴM universitycontest.iac.kz aqparattyq júiesi arqyly elektrondyq formatta qabyldanady.
«Joǵary oqý oryndarynyń qyzmetkerleri men professorlyq-oqytýshylar quramynan turatyn sarapshylar toby kelip túsken barlyq qujatty tekseredi. Saraptaý tobynyń qorytyndysy negizinde JOO komissiiasy konkýrsqa qatysýshylardyń ekinshi respýblikalyq kezeńge qatysýy týraly sheshim shyǵarady. Respýblikalyq deńgeide qurylǵan komissiia quramyna úkimettik emes uiymdardyń, BAQ, stýdenttik jáne jastar uiymdarynyń, JOO qaýymdastyqtarynyń ókilderi men sarapshylar endi», – dedi QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
Aita keteiik, «Joǵary oqý ornynyń úzdik oqytýshysy» baiqaýynyń jeńimpazdary aqshalai yntalandyrýmen qatar tósbelgige ie bolady.
Baiqaý aqparattyq júie bazasynda ótedi, sáikesinshe konkýrsqa qatysýshylar barlyq kezeńniń ashyq ótýin baqylai alady.
