Foto: Pexels.com
QR Oqý-aǵartý ministrligi jetim balalar men ata-anasynyń qamqorlyǵynsyz qalǵan balalarǵa tálimger bolǵysy keletin azamattar úshin mindetti oqytýdy engizetin buiryq shyǵardy. Oqý kýrsyn aiaqtaǵannan keiin, tálimgerge biliktiligin rastaityn sertifikat beriledi, dep habarlaidy Ult.kz.
Oqytýdy tálimgerlikpen ainalysatyn uiymdar júrgizedi. Kandidattar jazbasha ótinish berip, qajetti qujattardy tapsyrady. Oqý uzaqtyǵy eki aptadan aspaidy. Kýrsty aiaqtaǵan soń testileý ótkiziledi, ony sátti tapsyrǵan azamattarǵa sertifikat beriledi.
«Tálimgerlerdi mindetti sertifikattaý — ata-anasynyń qamqorlyǵynsyz qalǵan balalarǵa sapaly qoldaý kórsetýdi qamtamasyz etýdiń mańyzdy qadamy. Daiyndyqtan ótken tálimgerler balalardyń áleýmettenýine jáne eresek ómirge daiyndyǵyna tiimdi kómektese alady dep senemiz», — dep atap ótti QR Oqý-aǵartý ministrligi Balalardyń quqyqtaryn qorǵaý komitetiniń tóraǵasy Nasymjan Ospanova.
Tálimger bolýǵa úmitker — QR kámeletke tolǵan azamaty, qorǵanshylar men qamqorshylarǵa qoiylatyn talaptarǵa sáikes kelýi tiis. Tálimgerlik qyzmet aqysyz túrde júzege asyrylady jáne 10 jastan asqan, jetim balalar men ata-anasynyń qamqorlyǵynsyz qalǵan balalarǵa arnalǵan bilim berý uiymdarynda tárbielenip jatqan balalarǵa qoldaý kórsetýge baǵyttalǵan.
Eske salsaq, Qazaqstanda tálimgerlik institýty 2024 jyly engizilgen bolatyn. Onyń maqsaty — jetim jáne ata-anasynyń qamqorlyǵynsyz qalǵan balalarǵa jeke qoldaý kórsetý. Bul mehanizm tárbielenýshilerdi óz betinshe ómir súrýge daiyndaýǵa yqpal etedi.
