Elimizde alǵash ret Getemotions atty jańa áleýmettik jeli iske qosyldy, dep habarlaidy QazAqparat.
«Kez kelgen adamda belgili bir taqyryp boiynsha suraq bolatyny sózsiz. Osy oraida biz elimizde alǵash ret anonimdi túrde kez kelgen taqyrypta suraq qoiyp, oǵan jaýap alýǵa bolatyn áleýmettik jeli oilap taptyq. Getemotions áleýmettik jelisi arqyly anonimdi túrde saýal joldap, oǵan anonimdi jaýap alý múmkindigi bar. Atalǵan jeliniń artyqshylyǵy sol kimniń qandai suraq qoiyp jatqanyn jáne oǵan kimniń jaýap berip jatqanyn eshkim bilmeidi. Iaǵni qupiialylyq barynsha saqtalǵan. Árine basqa áleýmettik jeliler sekildi bizde de tyiym salynǵan taqyryptar bar. Demek kelip túsken saýaldar irikteýden ótedi», - dedi GetEmotions jobasynyń negizin qalaýshy Aitýǵan Omarov OKQ-de ótken baspasóz qyzmetinde.
Onyń aitýynsha, ekijaqty bailanys 100 paiyz jasyryn túrde ótedi.
«Eger sizdiń suraǵyńyzǵa dóreki jaýap berilse nemese jaýapqa riza bolmasańyz, kez kelgen sátte atalǵan jelini buǵattai alasyz. Buǵattaǵan soń osyǵan deiingi habarlamalar avtomatty túrde joiylady. Qoldanýshylardan kelip túsip jatqan taǵy bir suraq, kimniń qandai suraq joldap jatqanyn kim baqylaidy? Aitarym, júie avtomattandyrylǵan, bizdiń mamandar, onyń ishinde jelini ázirleýshiler de kimniń qandai suraq joldap jatqanyn bile almaidy. Bizdiń mindet tek kelip túsken saýaldy qabyldaý nemese odan bas tartý», - deidi ol.
Getemotions avtorlarynyń málimdeýinshe, atalǵan jeli el kóleminde 6 qazannan bastap testileý rejiminde iske qosyldy.
