Elimizde «WorldSkills Kazakhstan 2021» VI Respýblikalyq chempionaty bastaldy. Chempionattyń resmi ashylý saltanaty Bilim jáne ǵylym ministri Ashat Aimaǵambetovtiń qatysýymen ótti, dep habarlaidy "Ult aqparat" ministrliktiń baspasóz qyzmetine silteme jasap.
«Qurmetti áriptester, Ulttyq chempionatqa qatysýshylar! Barshańyzdy chempionattyń bastalýymen quttyqtaimyn! Birneshe jyl buryn biz WorldsSkills álemdik qozǵalysyna qosylyp, 50-orynda turaqtaǵan edik. Qazirdiń ózinde biz álemdik reitingtegi pozitsiiamyzdy edáýir kúsheitip, 14-shi orynǵa ie bolyp otyrmyz. Bul aitarlyqtai jetistik, biraq biz aldymyzǵa budan da órshil mindetter qoiýymyz kerek. Kelesi jyly Shanhaida ótetin halyqaralyq chempionatta biz tehnikalyq jáne kásiptik bilim berýde úzdik komandalardyń alǵashqy ondyǵyna kirýimiz qajet. Men stýdentterimizge senim artamyn. Álbette, bul qol jetkizýge bolatyn mindet dep sanaimyn. Sizderge tolaǵai tabys pen jeńis tileimin», – dedi ministr Ashat Aimaǵambetov quttyqtaý sózinde.
Bilim jáne ǵylym ministri memleket tehnikalyq jáne kásiptik bilim berýdi damytýǵa erekshe kóńil bóletinin atap ótti. Prezidenttiń tapsyrmasy boiynsha 2025 jylǵa qarai barlyq tilek bildirýshi tegin tehnikalyq jáne kásiptik bilimmen qamtamasyz etiledi.
«Jas maman» baǵdarlamasy boiynsha elimizdiń 180 kolledji zamanaýi quraldarmen jabdyqtaldy, olar arqyly stýdentter praktikalyq bilim men daǵdylar alady. Materialdyq-tehnikalyq bazany nyǵaitýdyń arqasynda biz Chempionatty ótkizý geografiiasyn keńeittik. Biyl ol saiys 8 qalada ótedi», – dedi Ashat Aimaǵambetov.
«WorldSkills Kazakhstan 2021» respýblikalyq chempionaty 1 qarasha men 10 jeltoqsan aralyǵynda Nur-Sultan, Almaty, Aqtaý, Atyraý, Kókshetaý, Qostanai, Qaraǵandy, Semei qalalaryndaǵy kolledjder bazasynda ótedi. Barlyǵy 18 jarys alańy uiymdastyryldy. Elimizdiń barlyq óńirinen kelgen 450-den astam jas maman 30 negizgi jáne 40-tan astam qosymsha quzyretter boiynsha óz daǵdylaryn kórsetedi. Olar kelesi bloktarǵa bólingen: «Aqparattyq-kabeldik jeliler», «Mehatronika», «Injenerlik grafika CAD», «Bizneske arnalǵan IT-sheshimder», «Bastaýysh synyptarda oqytý», «Mektepke deiingi tárbie», «Mobildi robototehnika», «Jeńil avtomobilderdi jóndeý jáne qyzmet kórsetý» jáne basqalar. Qatysýshylardyń, iaǵni kolledjder men JOO stýdentteriniń, sondai-aq kásiporyndardaǵy jas qyzmetkerlerdiń jumysyn 500-ge jýyq sarapshy baǵalaityn bolady.
Aita keteiik, WorldSkills halyqaralyq qozǵalysy jumysshy mamandyqtarynyń bedelin arttyrýǵa jáne olardy tanymal etýge baǵyttalǵan ári bilikti kadrlardy daiarlaýda jańa trendter jasaidy. Oǵan álemniń 80-nen astam eli qatysýda.
Qazaqstan WorldSkills International (WSI), WorldSkills Europe (WSE) jáne WorldSkills Asia (WSA) tolyq quqyqty múshesi bolyp tabylady. Biyl Eýropa chempionatynda qazaqstandyq Dina Afanaseva alǵash ret «Veb-ázirleý» quzyrettiligi boiynsha qola medalǵa ie boldy. Qazaqstannyń WSE reitingi 2016 jylmen salystyrǵanda 20 pozitsiiaǵa nyǵaiyp, 9 orynǵa jetti.
