Qazaqstanda volonter-stýdentterdi materialdyq yntalandyrý júiesi engizildi. Endi volonterlik qyzmetpen belsendi ainalysatyn bilim alýshylar atqarǵan eńbegi úshin aqshalai syiaqy ala bastaidy. Sondai-aq akademiialyq kreditter eseptelýi múmkin. QR Bilim jáne ǵylym ministrligi tiisti normalardy engizdi, dep habarlaidy "Ult aqparat".
Bul sheshim áleýmettik mańyzdy qyzmetpen ainalysatyn belsendi stýdentterdiń sanyn kóbeitý maqsatynda qabyldanyp otyr. Mysaly, muqtaj adamdarǵa kómek kórsetý, túrli áleýmettik jobalardy júzege asyrý jáne t.b.
«Ministrlik jastardyń bastamalaryna erekshe den qoiyp, olardyń bastamalaryn qoldaidy. Máselen, endi 20 saǵattyq volonterlik qyzmet úshin stýdentterge vaýcher túrinde kredit beriledi. Bul stýdent oqityn joǵary oqý ornynda/bilim berý uiymynda eki akademiialyq kreditti (saǵatty) esepke alýǵa múmkindik beredi. Sondai-aq stýdent 20 000 teńge mólsherinde birjolǵy aqshalai tólem alady. Eger stýdent 50 saǵat jumys istese, oǵan bes akademiialyq kredit (saǵat) eseptelip, 50 000 teńge tólenedi», – dedi QR BǴM «Qarjy ortalyǵy» AQ basqarma tóraǵasy Asqar Ibraimov.
Aita keteiik, volonter-stýdentterge arnalǵan tólemder tilderdi oqytý jáne kompiýterlik saýattylyq boiynsha repetitorlyq qyzmet úshin, erekshe bilim berý qajettilikteri bar balalarmen jumys, sonymen birge aýla jáne sport klýbtaryn uiymdastyrǵany úshin, balalar, qarttar jáne múmkindigi shekteýli adamdarmen júrgizilgen áleýmettik jumys, qorshaǵan ortany qorǵaý jáne basqa da qyzmetter úshin qarastyrylǵan.
Volonter-stýdentterdi kótermeleý júiesin engizý – jastar arasynda áleýmettik jaýapkershilikti damytý jáne Qazaqstanda volonterler qozǵalysyn ilgeriletý barysynda jańa serpin bolmaq.
