1 aqpannan beri koronavirýsqa qarsy vaktsina alǵan 482 adam indetten kóz jumdy. Bul týraly Densaýlyq saqtaý ministri Aleksei Tsoi málimdedi, dep habarlaidy "Ult aqparat".
"Biyl 1 aqpannan bastap tamyz aiynyń sońyna deiin vaktsina alǵan soń qaitys bolǵandardyń sany - 482. Bul - KVI-den qaitys bolǵandardyń jalpy sanynyń 5 paiyzy. Osy oraida jalpy atalǵan indetten qaitys bolǵandardyń deni - vaktsina almaǵan jandar ekenin eske salǵym keledi. Vaktsina alǵannan keiin mert bolǵan 482 adamnyń 23-i Corona Vac saldyrǵan, 371-i «Spýtnik V» vaktsinasyn qabyldaǵan, taǵy 75 adam Vero Cell ekken jáne 13 adam otandyq QazVac-ty alǵan", - dedi Tsoi úkimet úiinde ótken baspasóz máslihatynda.
Osy oraida jýrnalister buǵan deiin Densaýlyq saqtaý vitse-ministri Ajar Ǵiniiat 1 aqpannan 31 shildege deiingi aralyqta 115 vaktsinalanǵan adam qaitys bolǵanyn málimdegenin eske saldy.
"Búgin siz 2021 jyldyń tamyz aiyndaǵy jaǵdai boiynsha 482 adam vaktsinadan keiin aýyryp qaitys boldy dep otyrsyz. Sonda bir ǵana tamyz aiynda 367 adam kóz jumdy ma?", - dep surady BAQ ókilderi Tsoidan.
Ministr bul aqpannan tamyz aiyn qosa alǵandaǵy statistika ekenin atap ótti.
"482 adamnyń bári – tolyq vaktsinalanǵandar. Sizder bilesizder, bizde shilde-tamyz ailarynda aýrýshańdyq ósip, ólim-jitim kóp boldy. Sondyqtan osyndai aiyrmashylyq bar. Biraq báribir de koronavirýstan qaitys bolǵandardyń deni vaktsina almaǵandar ekenin kórip otyrmyz. Sondyqtan men osyǵan nazar aýdarýdy suraimyn", - dep túiindedi Tsoi.
Buǵan deiin vedomstvo basshysy eldegi epidjaǵdaidyń jaqsarǵanyn jetkizgen edi.
«Qazaqstandyqtar koronavirýs dáýirinde ómir súrip jatqanyn túsiný kerek. Qazirgi ýaqytta 6 millionnan astam qazaqstandyq tolyq vaktsina aldy. Búginde halyqtyń belgili bir bóliginde immýndyq qabilet jaqsaryp, sáikesinshe, epidjaǵdai jaqsaryp keledi», - dep edi ministr.
