Qazaqstan Respýblikasy Prezidenti Qasym-Jomart Toqaevtyń qatysýymen ótken IIM alqa otyrysynda Ishki ister ministri Erlan Turǵymbaev memleket basshysyna elimizde týristik politsiia qurylatyny týraly málimdedi, dep habarlaidy "Ult aqparat".
Elimizdiń Tuńǵysh Prezidenti - Elbasy Nursultan Ábishuly Nazarbaev bekitken týristik salany damytý tujyrymdamasy aiasynda IIM bastamasymen «E-viza», «E-qonaq úi» elektrondy bazasyn qurý jóninde usynys jasaldy.
Búginde 117 eldiń azamattary úshin elektrondy túrde rásimdeledi jáne memlekettik shekaradan ótken boida avtomatty túrde tirkeledi. «E-qonaq úi» málimetter bazasy sheteldikterdiń turatyn jerinen esep júrgizýge múmkindik beredi jáne tirkelý úshin mindetti túrde politsiiaǵa kelýdiń qajettigi bolmaidy.
Óz kezeginde, sheteldikterdi jáne investorlardy tartý úshin jáne shetel azamattarynyń elimizge kelgen kezdegi qaýipsizdigi men jailylyǵyn jańa bólinis - týristik politsiia qamtamasyz etetin bolady.
Týristik politsiianyń basty mindeti - kelgen týrister men qonaqtarǵa qyzyqtyrǵan suraqtar boiynsha keńester, aqparattar berý jáne olardyń qaýipsizdigin qamtamasyz etý.
Birinshi kezeńde bul bólinister Nur-Sultan, Almaty qalalarynda, Aqmola, Almaty, Túrkistan jáne Shyǵys Qazaqstan oblystarynda quryldy.
Týristik politsiia qyzmetkerleri beinetirkeýishtermen, planshettermen, ratsiiamen jabdyqtalady jáne olar memlekettik tildi, orys jáne aǵylshyn tilderin, elimizdiń tarihyn bilýi tiis, sondai-aq tez til tabysa biletin jáne jedel áreketke árdaiym daiyn bolýy kerek.
Qasym-Jomart Toqaev investitsiialyq jaily klimatty qalyptastyrýda sheteldikterdiń qaýipsizdigin qamtamasyz etýdiń mańyzdy ekenin atap kórsete otyryp, sheteldik týristermen jumys barysynda jekelegen politsiia bólinisterin mamandandyrý boiynsha qabyldanyp jatqan sharalardy maquldady.
