Qazaqstanda til máselesi, ulttyq másele múldem kóterilip otyrǵan joq. Mundai pikirdi Qazaqstan Konstitýtsiiasy kúnine arnalǵan «Táýelsizdiktiń 30 jyldyǵy – birliktiń, beibitshilik pen kelisimniń 30 jyldyǵy» taqyrybynda ótken dóńgelek ústel barysynda Májilis depýtaty Iýrii Li bildirdi, dep habarlaidy QazAqparat.
Onyń atap ótýinshe, Qazaqstanda ultyna qaramastan kez kelgen adamnyń bizneste de, memlekettik qyzmette de ilgerileýine múmkindi berilgen. Elimizde barlyq derlik etnostardyń ókilderi memlekettik biliktiń túrli deńgeińinde eńbek etip, túrli memlekettik tapsyrmalardy sheshýge qatysyp keledi. Buǵan qosa, memlekettik tilmen qatar orys tili de barlyq jerde qoldanylady.
«Bul biz kórip otyrǵan fakti», - dep atap ótedi Májilis depýtaty.
Sonymen qatar ol elimizdiń Konstitýtsiiasymen qazaqstandyq etnostardyń tilin, mádenieti men dástúrin damytýǵa barlyq jaǵdai qarastyrylǵandyǵyna keńinen toqtaldy. Tiline, jynysyna, násiline jáne basqa da belgilerine bailanysty kez kelgen kemsitýshilikke tyiym salynǵandyǵyna nazar aýdartty. Elimizdiń bilim berý standarttary barlyq etnosqa ózderiniń mádeni-tildik qajettiligin qanaǵattandyrýǵa múmkindik beretindigin basa aitty.
«Til máselesi, ulttyq másele múldem kóterilip otyrǵan joq», - dedi Iýrii Li.
Aita keteiik, is-sharaǵa Májilis depýtattary, Qazaqstan halqy Assambleiasy saraptamalyq keńesiniń músheleri, ziialy qaýym men etnomádeni birlestikterdiń ókilderi qatysty. Olar azamattardyń quqyqtary men bostandyqtary, Ata zańnyń normalarymen bekitilgen teńdik, birlik, zań ústemdigi qaǵidattary týraly máselelerdi qozǵady. Qazaqstannyń Táýelsizdik jyldaryndaǵy eldegi etnosaralyq, qoǵamdyq kelisim men jalpyulttyq birlikti qamtamasyz etýsalasyndaǵy mańyzdy jetistikteri talqylandy.
