«Aqmeshit» gýmanitarlyq-tehnikalyq institýty bas litsenziiasynan aiyryldy.
QR BǴM Bilim jáne ǵylym salasynda sapany qamtamasyz etý Komiteti júrgizgen qaita tekserýdiń nátijeleri osyndai boldy, dep habarlaidy "Ult aqparat" ministrliktiń baspasóz qyzmetine silteme jasap.
Buǵan deiin JOO-da tekserý júrgizilip, onyń qorytyndysy boiynsha Komitet qyzmetkerleri túrli zańbuzýshylyqtardy anyqtady.
Qyzylorda qalasyndaǵy «Aqmeshit» institýtyna uiǵarym berilip, oqý ornyna barlyq sáikessizdikti joiýǵa ýaqyt berildi. Alaida, joǵary oqý orny berilgen ýaqytty bilim berý qyzmetteriniń sapasyn jaqsartý úshin qajetti jumysty júrgizý máselesine emes, sot talqylaýyna jáne QR BǴM komitetiniń is-áreketterine shaǵymdanýǵa jumsady.
«Joǵary oqý oryndarynda tekserý jumystaryn bilim berý sapasy men kadrlar daiarlaýdy jaqsartý úshin júrgizetinimizdi túsiný mańyzdy. Bul rette biz JOO-lardy litsenziiadan birden aiyrmaimyz jáne olardy birden jappaimyz. Joǵary oqý oryndaryna buzýshylyqtardy joiýǵa ýaqyt berilgenimen, eshqandai áreket bolǵan joq.
Osyǵan bailanysty biz keiinirek qatań sharalar qabyldaýǵa májbúrmiz. Joǵary oqý oryndarynyń stýdentteri úshin jaǵdai jasap, bilim berý baǵdarlamalarynyń sapasyn jaqsartýǵa qol jetkizýi mańyzdy. Áitpese, josyqsyz ýniversitetter sapaly bilimmen qamtamasyz etpei, diplom berýdi jalǵastyratyn bolady.
«Aqmeshit» gýmanitarlyq-tehnikalyq institýtyna keletin bolsaq, sońǵy tekserý osy jyldyń maýsym aiynda júrgizildi. Buzýshylyqtar joiylǵan joq. Áńgime materialdyq-tehnikalyq bazanyń álsizdigi jáne oqý protsesin uiymdastyrýdaǵy eleýli kemshilikter týraly bolyp otyr. Ýniversitettegi keibir pánderdi tiisti bilimi men dárejesi joq oqytýshylar júrgizgen. Tipti oqý protsesi merziminen buryn aiaqtap, nátijesinde stýdentter bilim berý baǵdarlamalaryn tolyq igere almaǵan. Qazirgi tańda institýt oqý ornyn litsenziiadan aiyrý týraly qabyldaǵan sheshimimizge narazylyq bildirýge tyrysyp jatyr», – dedi QR BǴM Bilim jáne ǵylym salasynda sapany qamtamasyz etý komitetiniń tóraiymy Gúlzat Kóbenova.
Búgingi tańda «Aqmeshit» institýtynyń bilim berý qyzmetine akkreditatsiiasy joq. Alaida, diplomdardyń jaramsyz bolǵandyǵyna qaramastan, institýt olardy BǴM-de tirkelgen seriialar men nómirlersiz bergen.
Sondyqtan stýdentterdiń nazaryn joǵary oqý oryndary litsenziiadan aiyrylǵan bolsa jáne JOO akkreditteýden ótpegen jaǵdaida, bilim alýshylar granttardy saqtai otyryp ári igerilgen kreditter men pánderdi qaita tapsyryp, basqa joǵary oqý oryndaryna aýysýǵa quqyly ekendigine aýdaramyz.
Osy jyldyń túlekteri basqa joǵary oqý oryndaryna aýysa alady, jáne olardyń oqý nátijeleri eskerilip, diplom beriledi.
Bul joǵary jáne (nemese) joǵary oqý ornynan keiingi bilim berý uiymdary qyzmetiniń úlgilik qaǵidalarynda kózdelgen.
«Talapkerler men ata-analardy joǵary oqý ornyn tańdaý máselesine muqiiat bolýǵa shaqyramyz. Osy rette oqý orny usynyp otyrǵan bilimniń sapasyn, bolashaqta jumysqa ornalasýdyń perspektivalary, joǵary oqý ornynyń bedeli men reitingtegi ornyn eskerý qajet. Joo reitingin QR BǴM tapsyrysy boiynsha «Atameken» QR Ulttyq kásipkerler palatasy ótkizedi»,-delingen habarlamada.
