14 qyrkúiekte 2 930 adamnyń koronavirýs testi oń shyqty. Densaýlyq saqtaý ministrliginiń 15 qyrkúiek kúngi habarlamasynda osyndai málimet kórsetilgen.
Almatyda - 612, Qaraǵandy oblysynda – 340, Nur-Sultanda – 326, Almaty oblysynda 240 adamnan koronavirýs anyqtalǵan.
Indet bastalǵaly beri 848 myń adamnyń PTR testi oń shyqqan. 10 491-i qaitys bolǵan.
14 qyrkúiekte densaýlyq saqtaý ministri Aleksei Tsoi Qazaqstanda epidemiologiialyq ahýal turaqtaldy, keiingi eki aptada aýrý ósimi 35 paiyzǵa azaidy dep málimdegen. Ministrdiń aitýynsha, soǵan bailanysty 25 tamyzdan beri Almaty, Nur-Sultan, Shymkent qalalary, Atyraý, Qaraǵandy, Túrkistan, Mańǵystaý oblystarynda 57 statsionar jabylǵan.
Dúisenbi, 13 qyrkúiekte Qazaqstanda koronavirýspen bailanysty 77 adam ólimi tirkeldi: 64 adam – koronavirýstan, 13 adam koronavirýs pnevmoniiasynan qaitys boldy dep aitylady.
Qazaqstan 2020 jyldyń 1 tamyzynan bastap PTR testi teris shyqqan, biraq aýrý belgileri boiynsha koronavirýsqa uqsaityn "kovidtektes pnevmoniia" esebin júrgizip keledi. Osy kúnge deiin pnevmoniianyń bul túrine 73,1 myń adam shaldyqqan. Onyń ishinde 4700 adam aýrýdan aiyǵa almai qaitys bolǵan. 13 qyrkúiekte 302 adamǵa koronavirýs pnevmoniiasy diagnozy qoiyldy.
Qazir elde 75 685 adam koronavirýs infektsiiasynan (67 269 KVI+ jáne 8 416 KVI-) emdelip jatyr. Olardyń ishinde 14 335 patsient statsionarda, 61 350 naýqas ambýlatoriiada em qabyldap júr.
KVI+, KVI- shaldyqqandardyń arasynda: 1 136 adamnyń jaǵdaiy aýyr, 350 patsienttiń jaǵdaiy óte aýyr, 198 naýqas ÓJJ apparatyna qosylǵan.
19 million halqy bar Qazaqstanda úkimet 10 million azamatqa koronavirýs vaktsinasyn salýdy kózdep otyr. Búginge keiin deiin ekpeni 6 mln-ǵa jýyq adam tolyq alǵan. Budan bólek, 1,1 mln adam vaktsinanyń ekinshi dozasyn kútip otyr.
Vaktsina saldyrǵandar sany boiynsha Almaty qalasy aldyńǵy orynda, qalada 916 736 turǵyn vaktsinanyń birinshi komponentin, 814 080 adam ekinshi komponentin saldyrǵan.
Ekpe alýdan ekinshi orynda - Túrkistan oblysy. Óńirde 815 405 adam koronavirýs vaktsinasynyń 1-komponentin, 634 826 adam 2-komponentin egilgen.
Úshinshi orynda - Almaty oblysy. Aimaqta 719 983 adam ekpeniń birinshi bóligin alsa, 600 494 adam ekinshi bóligin qabyldaǵan.
Amerikalyq Djons Hopkins ýniversitetiniń málimeti boiynsha, álemde 225 mln adam koronavirýsqa shaldyqqan, 4,6 milliony qaitys bolǵan.
