QR Sybailas jemqorlyqqa qarsy is-qimyl agenttigi pen «Qazposhta» AQ sybailas jemqorlyqqa qarsy kúreske arnalǵan poshta markalaryn satylymǵa shyǵardy, dep habarlaidy "Ult aqparat".
QR Sybailas jemqorlyqqa qarsy qyzmeti — taqyryptyq marka shyǵarǵan alǵashqy quqyq qorǵaý organy.
Marka dizainyna quqyq qorǵaý organynyń kommýnikativti logotipi negizge alynǵan. Markada Agenttiktiń «Ádildik. Parasattylyq. Senim» qundylyqtary jazylǵan. Bul qundylyqtar logotipte qoldanylǵan tústerde de berilgen: aspan tústes – ádildikti, kemeldikke, jańarýǵa umtylýdy; kók tús – senim men qaýipsizdikti beineleidi.
Poshta markasyna estelik belgi soǵý saltanaty Agenttik Tóraǵasy Alik Shpekbaev pen «Qazposhta» AQ Basqarma Tóraǵasy Sáken Sársenovtiń qatysýymen ótti.
Sybailas jemqorlyqqa qarsy qyzmet basshysy óz sózinde sharanyń mańyzdylyǵyn atap ótti.
«Jemqorlyqpen kúres ózgeriske ushyrady. Burynǵy qorqynyshty, jazalaý sharalaryna berilgen basymdyq endi quqyq buzýshylyqtardyń aldyn alýǵa aýysty. Condyqtan, agenttik qylmystyq-quqyqtyq sharalarmen qosa, jemqorlyqty qabyldamaý ideiasyn nasihattaýǵa, aqparattandyrýǵa, sonymen qatar azamattyq qoǵamdy keńinen jumyldyrýǵa kúsh salýda. Markany shyǵarý – osy joldaǵy qadamnyń biri», - dedi Alik Shpekbaev.
Ulttyq poshta operatorynyń basshysy Sáken Sársenov: ««Marka shyǵarý - Qazaqstan aýmaǵynda sybailas jemqorlyqqa tózbeý ideiasyn taratýǵa jáne sybailas jemqorlyq kórinisterine jol bermeý týraly Elbasy men Memleket basshysynyń ustanymyn saqtaýǵa múmkindik beretin oqiǵa bolady dep úmittenemiz», - dep atap ótti.
Marka 2020 jyldyń 24 maýsymynan bastap ainalymǵa enedi. Baǵasy – 200 teńge. Taralymy – 10 000 dana. Markany «Memleket saiasaty» seriiasymen Qazaqstan Respýblikasynyń Tsifrlyq damý, innovatsiialar jáne aeroǵarysh ónerkásibi ministrligi shyǵardy. Avtor jáne grafikalyq dizainer — D.So, tehnikalyq dizain — I.Ońǵarbaidiki.
