Almatydaǵy Shet tilderi pedagogikalyq kolledjiniń stýdentterine zaiyrly qoǵamdaǵy islam dininiń róli, dini ekstremizm men terrorizmniń aldyn alý jumystary túsindirildi, dep habarlaidy QazAqparat.
Almaty qalalyq qoǵamdyq damý basqarmasynyń uiymdastyrýmen shahardaǵy JOO men kolledj stýdentterine ekstremizm men terrorizmniń aldyn alý jumystary túsindirilýde. Arnaiy qurylǵan aqparattyq top músheleri jastarǵa bir saǵat dáris oqyp, stýdentterdiń din salasyna qatysty suraqtaryna jaýap beredi.
Ál-Farabi atyndaǵy QazUÝ dintaný jáne mádeniettaný kafedrasynyń aǵa oqytýshysy Elnar Berikbaev Shet tilderi pedagogikalyq kolledjiniń stýdentterine zaiyrly qoǵamdaǵy islam dininiń rólin túsindirip, dini ekstremizm men terrorizmniń qaýpin aitty.
«Resmi derek boiynsha búginde elimizde 15 myńdai azamat teris dini aǵymnyń jeteginde júr. Sońǵy 8 jylda elimizde 14 terakt bolǵan, saldarynan 90 adam qaza tapty. 32 adam lańkestik boiynsha ómir boiyna bas bostandyǵynan aiyrylsa, taǵy 50-dei adam jazasyn óteýde. Sondyqtan terrorizmge qarsy kúreste azamattarymyzǵa óz qundylyqtarymyzdy dáriptep, ideia etip usynyp jatyrmyz. Máselen, AQSh halqyn «Amerikalyq arman» siiaqty urandar biriktiredi. Bizdiń qundylyqtarymyzdyń qatarynda úlkendi syilaý, kishige izet kórsetý, jaqynyńa qol ushyn sozatyn «asar» salty bar. Qonaqjailyq, beibitsúigishtik siiaqty erekshelikterimiz kóp. Osynyń bárin dáriptei bilýimiz qajet», - deidi dintanýshy Elnar Berikbaev.
Qazaqstanda azamattardyń dini senim bostandyǵy qamtamasyz etilgen. Konstitýtsiia men ulttyq zańnamalar el turǵyndaryna barynsha keń quqyqtar berýmen qatar, bir mezgilde olardyń memleket pen qoǵam aldyndaǵy mindetterin de aiqyndap berdi.
«Qazaqtyń batyry Baýyrjan Momyshulynyń «Tártipsiz el bolmaidy, tártipke baǵynǵan qul bolmaidy» degen ataly sózi bar. Iaǵni, zańyn, ereje-tártibin syilamaǵan eldiń bolashaǵy bulyńǵyr degen sóz. Qazaqstan óziniń demokratiialyq, zaiyrly, quqyqtyq jáne áleýmettik memleket ekenin Konstitýtsiia arqyly bekitip, memleket pen dinniń araqatynasyn retteitin zaiyrlylyq qaǵidattaryna súienedi»,- dep túsindirdi Elnar Berikbaev.
Kezdesý barysynda dintanýshy Elnar Berikbaev memlekettik bilim berý júiesi de zaiyrly jáne onyń dini bilim berý júiesinen bólek ekenin basa aitty.
«Zaiyrlylyq bilim mekemelerinde jastardyń boiynda belgili bir dini kózqarasty qalyptastyrý durys emestigin bildiredi. Sondyqtan mekteptegi hidjab máselesin kóterýshi azamattar senim bostandyǵyna múmkindik beretin zańǵa jáne basshyǵa baǵynýy tiis. Al mektep qabyrǵasynda hidjabqa ruqsat berilmeýi bilim mekemesiniń ishki tártibin zaiyrlylyq qaǵidattaryna sai saqtaý maqsatynda ǵana jasalady. Mektepten tys oryndarda bul máselege qatysty eshqandai tyiymdar kózdelmegen», - dep qorytyndylady dintanýshy.
Sonymen qatar, lektor stýdentterge din salasyna qatysty suraqtar qoiyp, pikirlerin tyńdady. Jastardy ashyq dialogkqa shaqyrdy. Kolledj stýdentteri oilaryn jasyrmai aityp, ózderin tolǵandyrǵan suraqtaryn qoiyp, tolyqqandy jaýap aldy.
