Densaýlyq saqtaý ministriliginiń basshylyǵy senbi kúngi karantin tártibin jeńildetýge qatysty túsinik berdi, dep habarlaidy "Ult aqparat".
Ortalyq kommýnikatsiialar qyzmetinde «Atameken» UKP-nyń karantindik is-sharalardy jeńildetýge qatysty usynysy boiynsha suraq qoiyldy.
QR DSM sanitarlyq-epidemiologiialyq baqylaý komitetiniń tóraǵasy Aijan Esmaǵambetova bul másele turǵysynda aldaǵy bir aptada eldegi epidemiologiialyq jaǵdai nazarǵa alynatynyn atap ótti.
«Eger turaqtaný jaǵdaiy jalǵasatyn bolsa, onda kelesi senbiden bul sharalar qabyldanýy múmkin», - dedi komitet basshysy.
Óz kezeginde Densaýlyq saqtaý ministri Aleksei Tsoi demalys kúnderindegi lokdaýnǵa qatysty pikir bildirdi.
«Bul máselege qatysty «Atameken» palatasy bizben birge talqylady. Eger bizde jaǵdai turaqtasa, aldaǵy aptadan senbi kúnine qatysty jeńildetýdi qarastyryp otyrmyz. Atap aitqanda, Almaty boiynsha ahýal kúrdeli, ólim-jitim men indet juqtyrý deńgeii joǵary. Sondyqtan qazirgi kezdegi shekteý is-sharalary ondaǵy jaǵdaiǵa sáikes kelip tur. Bul turǵyda adamdardyń ómiri mańyzdy. Osy jaǵdaiǵa erekshe mán berip otyrmyz. Eger múmkin bolsa, onda jeńildetý qadamdaryn jasap, biznes úshin múmkindikterdi ashamyz», - dedi Tsoi.
