2020 jyldyń qańtar-qazan ailary aralyǵynda Qazaqstanda resmi dilerler 70 myńnan astam jańa kólik satty.
Bul týraly "Ult aqparat" «QazAvtoÓnerkásip» avtokólik salasyndaǵy kásiporyndar odaǵyna silteme jasap habarlaidy.
«Atalǵan kezeńde resmi dilerler 70 549 kólikti satty. Bul bir jyl burynǵy kórsetkishten 25,9 paiyzǵa joǵary. Biylǵy 10 aida qazaqstandyqtar jańa jeńil kólikterdi alýǵa 633,6 mlrd teńge jumsap, 2019 jylǵy deńgeiden 21,3 paiyzǵa artyq boldy», - delingen taratylǵan málimette.
Kólik satyp alýshy 50 425 adam (71,5 paiyzy) otandyq zaýyttardyń ónimine óz tańdaýyn jasaǵan. Sonymen qatar, biylǵy 10 aida satylǵan 20 124 avtomobil (28,5 paiyzy) importqa tiesili bolyp otyr.
Atalǵan merzimde elimizde suranysy joǵary brendterdiń arasynda Lada (15 219 kólik), Hyundai (13 456), Toyota (8 612 ), Ravon (6 906 ) jáne Chevrolet (5 667) kólikteri kósh bastady.
Munymen qosa, satylymy joǵary bolǵan TOR-ondyqta – KIA (5 060 kólik), GAZ (2 360), Renault (2 172 ), Volkswagen (1 985 ) jáne Nissan (1 852) bar.
