Pfizer-BioNTech Comirnaty vaktsinasy Qazaqstanda ýaqytsha tirkeý kýáligin aldy.
Densaýlyq saqtaý ministrligi Meditsinalyq jáne farmatsevtikalyq baqylaý komitetiniń saitynda Qazaqstanda tirkelgen vaktsinalardyń tizimine Pfizer de endi, dep habarlaidy "Ult aqparat".
Vaktsina tizimde «komirnati» degen atpen tur. Tirkeý ruqsaty Qazaqstan aýmaǵynda koronavirýstyń taralýyn boldyrmaý jónindegi vedomstvoaralyq komissiianyń 23 tamyzdaǵy otyrysy kezinde berilgen.
«2021 jylǵy 23 tamyzda QR Densaýlyq saqtaý ministrligi Meditsinalyq jáne farmatsevtikalyq baqylaý komiteti «Komirnati» vaktsinasyna mRNQ negizindegi (nýkleozidtermen modifikatsiialanǵan) COVID-19-ǵa qarsy vaktsina retinde 8 ai merzimge ýaqytsha tirkeý kýáligin berdi», - dep jazylǵan resmi saitta.
Amerikalyq vaktsinaǵa dárilik zattar men meditsinalyq buiymdardy suryptaý ulttyq ortalyǵy oń qorytyndy bergen.
Aita keteiik, buǵan deiin Pfizer vaktsinasyn birinshi kezeńde 12 jastan asqan balalar men júkti áielder alatyny týraly belgili bolǵan.
"Bastapqy kezeńde, qazanda Pfizer vaktsinasy tek balalar men júkti áielder úshin qoljetimdi bolady, sondyqtan oǵan senýdiń qajeti joq. Qazir baryp, vaktsina saldyrý kerek", - dedi Densaýlyq saqtaý ministri Aleksei Tsoi.
Vaktsina balalarǵa tek ata-ana nemese zańdy qamqorshysynyń ruqsatymen ǵana salynady.
Qazaqstanda tirkelgen koronavirýsqa qarsy vaktsinalardyń tolyq tizimin myna jerden kóre alasyz.
