Pandemiia bastalǵaly beri Qazaqstanda 18 meditsinalyq qyzmetker qaitys bolǵan. Bul týraly QR bas memlekettik sanitar dárigeri Aijan Esmaǵambetova málim etti, dep habarlaidy QazAqparat.
«Ondai qaiǵyly oqiǵanyń 18 jaǵdaiy tirkeldi», - dedi Aijan Esmaǵambetova OKQ-daǵy baspasóz máslihatynda tilshilerdiń suraǵyna jaýap bere otyryp.
Aijan Esmaǵambetovanyń aitýynsha, bul jaǵdailardyń bári birdei KVI-men bailanysty emes.
«Alaida, olardyń arasynda COVID-19 aýrýyn juqtyrǵandarǵa kómek kórsetkender de bar», - dedi Aijan Esmaǵambetova.
Jalpy, qazirgi ýaqytta Qazaqstanda koronavirýs infektsiiasyn juqtyrǵan adamdardyń 11,5 paiyzy – meditsinalyq qyzmetkerler. Taǵy 492 medqyzmetker pnevmoniiamen aýyrǵan. 511 meditsinalyq qyzmetker emin jalǵastyrýda.
