Qazaqstanda ólim-jitim jaǵdaiy bir jylda 7,5 paiyzǵa azaidy, dep habarlaidy "Ult aqparat" ranking.kz aqparat kózine silteme jasap.
Ranking.kz zertteýine sensek, osy jyldyń birinshi toqsanynda Qazaqstanda 31,2 myń adam kóz jumǵan. Bul – bir jyl burynǵy kórsetkishten 7,5 paiyzǵa tómen. Osy adamnyń ishindegi 61,4 paiyzy (19,2 myń) - qala halqy bolsa, 38,6 paiyzy (12 myń) - aýyl turǵyndary.
«Genderlik aiyrmashylyq jaǵynan kóz jumǵan er adamdardyń sany áielderdiń sanynan artyq. Naqtyraq aitqanda, osy jyldyń úsh aiynda 14,4 myń áiel, 16,8 myń erkek o dúnielik bolǵan. Aimaqtardy salystyrar bolsaq, ólim-jitimniń kóp jaǵdaiy Shyǵys Qazaqstanda (3,3 myń adam – 2019 jyldyń alǵashqy úsh aiynda 3,7 myń adam bolǵan) tirkelgen. Odan keiingi tizimde Almaty oblysy (3,2 myń adam - 2019 jyldyń alǵashqy úsh aiynda 3,5 myń adam bolǵan) men Qaraǵandy oblysy (3,1 myń adam - 2019 jyldyń alǵashqy úsh aiynda 3,5 myń adam bolǵan) tur», - delingen zertteý qorytyndysynda.
Jalpy ólim-jitim jaǵdaiy 17 aimaqtyń 13-de baiqalady. 4 óńirde ǵana, atap aitqanda BQO (+3,4%), Shymkentte (+2%), Mańǵystaý oblysynda (+1,3%) jáne elordada (+0,2%) azdaǵan ósim bar.
«Eldegi ólim-jitim jaǵdaiynyń tórtten bir bóligi nemese 23,7% (7,4 myńy) qan ainalymy júiesindegi aýrýlarǵa tiesili. Onyń ishinde 166 ólim gipertoniialyq aýrýdan, 2,5 myń jaǵdai júrektiń ishemiialyq aýrýynan, 2,7 myńy midyń tamyrly zaqymdanýynan keledi. Al oqys oqiǵalar men ýlanýdan, jaraqattardan 2,4 myń ólim jaǵdaiy tirkelgen», - delingen zertteýde.
