QR Bilim jáne ǵylym birinshi vitse-ministri Sholpan Karinova biylǵy oqý jylynyń alǵashqy toqsanyn qorytyndylady, dep habarlaidy QazAqparat.
«Kúzgi kanikýl jaqyndap keledi. Osy aptada mektepterde bólim úshin jiyntyq baǵalaý (BJB) jalǵasýda. Kelesi aptada barlyq negizgi pánder boiynsha TJB ótkiziledi. Birinshi toqsan úshin qorytyndy baǵalar kelesi aptada qoiylady. Kúzgi demalys 1 qarashada bastalyp, 7 qarashaǵa deiin jalǵasady. Aita ketý kerek, biylǵy oqý jylynda mektepterdiń 30%-ynda oqý protsesi bir aýysymda, mektepterdiń 68%-ynda eki aýysymda jáne balalar kontingenti kóp jáne oqýshy oryndarynyń tapshylyǵy bar mektepterdiń 2%-ynda oqý protsesi úsh aýysymda uiymdastyryldy», - dedi vitse-ministr Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, búgingi kúni qalypty rejimde 86,4%, aralas formatta 11,6% jáne ata-analardyń ótinishimen 0,6 % bala qashyqtan bilim alyp jatyr. Mektepterdi aýysym boiynsha jeńildetý úshin ár mektepke jeke pánderdi nemese jeke saǵattardy qashyqtan oqytý arqyly aralas oqytýdy uiymdastyrý quqyǵy beriledi. Bul múmkindikti negizinen Nur-Sultan, Almaty, Shymkent qalalarynyń, Almaty jáne Túrkistan oblystarynyń mektepteri paidalanady.
«Biylǵy oqý protsesi ótken jyldary jiberilgen olqylyqtardyń ornyn toltyrýdy eskere otyryp uiymdastyryldy. Bul jumys Y. Altynsarin atyndaǵy Ulttyq bilim akademiiasy daiyndaǵan ádistemelik usynymdar boiynsha júrgiziledi, neǵurlym kúrdeli taqyryptar tańdaldy. Sabaqtardy muǵalimder óz páni boiynsha jeke uiymdastyrady», - dedi vitse-ministr.
