Elimizde kúzet qyzmetimen ainalysatyn jeke uiymdarǵa litsenziiany kim beredi jáne ol qandai talappen beriledi? Bul suraqqa QR Ishki ister ministrliginiń Kúzet qyzmetin baqylaý departamentiniń sarapshysy Daniiar Sultanov jaýap berdi, dep habarlaidy QazAqparat.
«Elimizde kúzet qyzmeti týraly zańnamaǵa ózgerister men tolyqtyrýlar engizildi. Tiisinshe kúzet qyzmetimen ainalysatyn uiymdar men sala mamandaryna qoiylatyn talap ta ózgerdi. Aldymen uiym jeke kúzet qyzmetimen ainalysý úshin Ishki ministrliginiń arnaiy litsenziiasyn alýy kerek. Sondai-aq, ol uiymnyń kúzet salasynda kem degende 1 jyl tájiribesi bolýy tiis. Jeke keńsesi men tiisti qural-jabdyqtarynyń bolýymen qatar, kem degende 2 jedel áreket toby bolýy shart. Iaǵni shuǵyl jaǵdai týyndaǵan kezde atalǵan 2 toptyń músheleri jedel áreketke daiyn bolýy tiis. Árine, qyzmettik kóliktiń bolýy da mindetti», - dedi Daniiar Sultanov «Kazakhstan Security Systems -2021» atty respýblikalyq konferentsiia barysynda.
Sondai-aq, IIM ókili kúzet qyzmetimen ainalysatyn uiymnyń jetekshisi onyń qyzmetine tikelei jaýapty bolatynyn eske saldy.
«Litsenziia berý ýaqyty jaǵynan ártúrli, sebebi bul óte tiianaqty tekserýdi talap etetin protsess. Litsenziia berilmesten buryn kúzet mekemesimen kelisimshart jasalady. Atalǵan qyzmetke qatysty taǵy bir mańyzdy jait kúzetshi mamandardyń daiarlyǵy. Qyzmetkerler únemi bilim-bilikterin jetildirip otyrýy tiis. Olardyń áskeri nemese sport dárejesi bolǵany abzal. Sol sekildi kúzet qyzmetimen ainalysatyn uiym qaýipsizdik salasyna qatysty zańnamalardy qatań saqtaýy tiis, onyń ishinde terrorizmge qarsy kúres týraly zań da bar», - deidi ol.
Odan bólek, sarapshy kúzet qyzmeti jumysyn ilgeriletýde profilaktikalyq sharalardyń da mańyzǵa ie ekenin alǵa tartty.
