Qazaqstanda eńbek quldyǵynda bolǵan Resei azamaty, Iaroslavl oblysynyń týmasy Aleksei Kotov Qaraǵandy oblysynan Reseidiń Nur-Sultan qalasyndaǵy elshiligine kelgen. Ol Reseige ushýdy josparlap otyr. Bul týraly Iaroslavl oblysyndaǵy adam quqyqtary jónindegi ýákil Sergei Babýrkin málim etti, dep habarlaidy QazAqparat TASS agenttigine silteme jasap.
Buǵan deiin áleýmettik jelilerge monitoring júrgizý barysynda Qaraǵandy oblysy kriminaldyq politsiia basqarmasynyń qyzmetkerleri er adamnyń ózin qystaqtardyń birinde zańsyz ustaǵany týraly habarlaǵan videony anyqtaǵan bolatyn.
Videoda Kotov 20 jyl jumys isteýge májbúr bolǵanyn, is júzinde quldyqta bolǵanyn aitqan.
«Men telefon arqyly onymen (Kotovpen – red.) sóilestim, ol qazir Nur-Sultan qalasyndaǵy Resei elshiliginde. Qazir Reseige kelý úshin qujattardy rásimdeý máselesi sheshilip jatyr jáne jaqyn arada ony týǵan jerimizde qarsy alamyz dep oilaimyn», - dedi Babýrkin.
Qazirgi ýaqytta Kotov Qazaqstannan ketý úshin qujat rásimdeýdi kútip otyr. Qujattar alynǵannan keiin ol Máskeýge ushady.
Resei Federatsiiasynyń Qazaqstandaǵy elshiliginiń málimetinshe, ony ápkesi qarsy alady.
Aleksei Kotov 1977 jyly Iaroslavl oblysynyń Gavrilov-Iamskii aýdanynyń Gore-Griaz aýylynda dúniege kelgen.
1997 jyly ol kelisimshart boiynsha áskerge ketken, Qazaqstanda áskeri boryshyn ótegen. 1998 jyly mamyrda ol úige qaitýy tiis bolǵan, biraq kelmegen.
1999 jyly aqpanda Kotov jaqyndaryna jazǵan hatynda ony uryp-soqqanyn, aýrýhanada emdelip shyqqanyn habarlaǵan.
Kotov 1999 jyldyń shildesinde bailanysqa shyǵýyn toqtatqan.
Buǵan deiin Iaroslavl oblysy gýbernatorynyń mindetin atqarýshy Mihail Evraev Kotovqa Otanyna oralýǵa, sodan keiin óz-ózine kelýine jáne jumysqa ornalasýyna kómek kórsetetinin aitqan. Iaroslavl oblysynda ony ata-anasy, úsh ápkesi jáne eki aǵasy kútip otyr.
