Qazaqstanda 6 tamyz kúni koronavirýstan 122 adam kóz jumdy. Bul týraly densaýlyq saqtaý ministrligi habarlady.
Ministrlik málimetinshe, Nur-Sultanda 20, Almatyda 19, Shymkentte 18 jáne Qaraǵandy oblysynda 13 kisi jan tásilim etken. Tek Túrkistan oblysynda ǵana atalǵan kúni kisi ólimi tirkelmegen.
Koronavirýstyń resmi statistikasynda aýrýdan qaitys bolǵandardyń jalpy sany 10651-ge jetip otyr. Bilik budan bólek koronavirýs juqtyrǵany rastalǵan, biraq "ózge aýrýdan kóz jumǵandardyń" esebin júrgizip keledi. Densaýlyq saqtaý ministrliginiń dereginshe, 2020 jylǵy naýryz ben 2021 jylǵy maýsym aralyǵynda bul tizimde 2367 adam bolǵan.
Elde maýsym aiynan beri koronavirýstyń "delta" varianty tez tarap, osy kúnderi táýlik saiyn 8 myńnan astam naýqas tirkelip júr. Indet bastalǵaly koronavirýspen 697 580 adam tirkelgen. Biraq mamandardyń aitýynsha, virýs juqtyrǵandar sany budan kóp. Bilik byltyr tamyzǵa deiin naýqastardy tek oń nátijesi PTR anyqtamasy boiynsha tirkep kelgen. Sóitip oǵan deiingi maýsym jáne shilde ailarynda pnevmoniiaǵa shaldyqqan júzdegen myń adam koronavirýs statistikasyna kirmei qalǵan.
Vaktsinalaý naýqanyn biyl 1 aqpanda bastaǵan Qazaqstanda 4 million 356 myń 279 adam tolyq vaktsinalanyp úlgergen. 1 million 371 myń adam koronavirýs ekpesiniń birinshi komponentin alyp, ekinshisin tosyp otyr.
Vaktsina saldyrýdan elimizde Almaty qalasy birinshi orynda, 768 myń adam ekpeniń birinshi komponentin, 601 myń adam ekinshi komponentti saldyrǵan. Ekinshi orynda Túrkistan oblysy, 624 myń adam ekpeniń birinshi bóligin alsa, ekinshi bóligin 455 myń adam egilgen. Úshinshi orynda Almaty oblysy tur. Óńirde 581 myń vaktsinanyń birinshi komponentin, 439 myń adam ekinshi komponentin alǵan.
19 million halqy bar Qazaqstanda 10 million adam ekpe saldyrýǵa jatady.
