Qazaqstanda bir kúnde koronavirýstan qaitys bolǵandar rekordtyq kórsetkishke jetti. 1 tamyzda elde 126 adam koronavirýs pen pnevmoniiadan qaitys boldy: 110 adam – koronavirýstan, 16 adam koronavirýs pnevmoniiasynan kóz jumdy dep aitylady. Mundai kórsetkish buryn-sońdy tirkelmegen.
Ótken aptadan beri elde bir kúnde anyqtalatyn naýqastar 7 myńnan asyp júr. 2 tamyzda 7481 adamnyń analizinen koronavirýs anyqtaldy. 1 tamyzda 46 adamǵa koronavirýs pnevmoniiasy diagnozy qoiylǵan.
Seisenbi kúni Nur-Sultanda – 1270, Almatyda – 1531, Shymkentte – 575, Qaraǵandy oblysynda – 941, Atyraý oblysynda 406 adamnan koronavirýs anyqtalǵan. Bir kúnde anyqtalatyn naýqastardyń 60 paiyzy osy úsh qala men eki oblys úlesinde. Qalǵan oblystarda bir táýlikte tirkelgen naýqastar 400-ge jetpeidi.
Sársenbi kúni Túrkistan oblysy koronavirýstyń taraýy boiynsha "qyzyl aimaqtan" "sary aimaqqa" oraldy. Qalǵan oblystar men qalalar "qyzyl aimaqta" tur.
2020 jyldyń naýryz aiynan beri Qazaqstanda 595 myń adamnyń koronavirýs testi oń kórsetken. 6153-i qaitys bolǵan.
Qazaqstan biligi pnevmoniianyń koronavirýsqa uqsas túrin 2020 jyldyń tamyzynan beri eseptep keledi. Sodan beri 61 myń adamǵa sondai diagnoz qoiylǵan, 3756-sy qaitys bolǵan.
Keibir sarapshylar Qazaqstan biligi taratqan koronavirýs boiynsha resmi málimetke kúmánmen qaraidy. Olardyń pikirinshe, bilik koronavirýs statistikasyn azaityp kórsetýge tyrysady nemese "koronavirýs pnevmoniiasy" siiaqty bólip-jaryp, málimetti burmalaýǵa tyrysady. Degenmen bilik mundai aiyptaýlardy joqqa shyǵarǵan.
3 tamyzdaǵy málimet boiynsha elimizde 102 839 adam koronavirýs infektsiiasynan (100 145 KVI+ jáne 2 694 KVI-) emdelip jatyr. Onyń ishinde 29 138 patsient - statsionarda, 73 701 naýqas ambýlatoriialyq deńgeide em qabyldaýda.
KVI+, KVI- shaldyqqandar arasynda:
- 1 707 adamnyń jaǵdaiy aýyr
- 395 patsienttiń jaǵdaiy óte aýyr
- 197 naýqas ÓJJ apparatynda jatyr.
Vedomstvo ótken aptada aýrýhanalardaǵy oryn tapshylyǵy týraly aitqan. Qazir kei aimaqta qosymsha oryndar daiyndalyp jatyr. Keibirinde sport keshenderi, qonaqúiler infektsiialyq statsionarǵa ainalǵan.
Buǵan deiin Almaty qalasynyń bas sanitar dárigeri Jandarbek Bekshin "indettiń tórtinshi tolqyny tamyzdyń ortasyna qarai sharyqtaý shegine jetedi", qyrkúiekte naýqastar azaiady degen boljam aitqan.
Resmi málimet boiynsha, Qazaqstan halqynyń 20 paiyzdan astamy koronavirýsqa qarsy vaktsinanyń eki dozasyn alǵan: 3,8 mln adamǵa eki dozasy salynǵan, 5,4 mln adam bir dozasyn alǵan.
Djons Hopkins ýniversitetiniń málimetinshe, Qazaqstan álemde koronavirýs juqtyrǵandar boiynsha (649 myń naýqas) 42-orynda tur. Postsovettik keńistikte Qazaqstannyń aldynda tek Ýkraina (2,3 mln) men Resei (6,2 mln) ǵana bar.
