Qazaqstanda koronavirýs taǵy 7315 adamnan anyqtaldy. Aýrýǵa osyǵan deiin shaldyqqan 123 adam kóz jumdy. Bul týraly 16 tamyzda eldiń densaýlyq saqtaý ministrligi habarlady.
Naýqastardyń 7217-si KVI+ sanatynan, iaǵni olardyń virýs juqtyrǵany PTR testimen rastalǵan. Al qalǵan 98 naýqasqa diagnozy aýrý belgileri boiynsha qoiylǵan, olardyń PTR testi teris shyqqan. Olardy KVI- nemese "kovidtektes pnevmoniia" naýqastary dep ataidy.
KVI+ boiynsha aimaqtar kóshin ádettegidei Almaty qalasy bastap otyr. Onda bir kúnde 1503 naýqas tirkelgen. Qaraǵandy oblysynda Covid 1003 adamnan anyqtalǵan. Al shildeniń sońynda kún saiyn 1,5 myńnan astam naýqas tirkelgen Nur-Sultanda 943 naýqas shyqqan.
Qazaqstannyń epidemiialyq kartasynda bir ǵana Túrkistan oblysy "jasyl aimaqta", qalǵany túgel "qyzyl aimaqta". Sońǵysy aýrýdyń qatty tarap jatqanyn bildiredi.
Elde keiingi kúnderi kún saiyn 7-8 myń naýqas anyqtalyp otyr. Bilik te, mamandar da muny koronavirýstyń "delta" variantymen bailanystyrady. Alǵash ret Úndistanda tirkelgen bul variant Qazaqstanda maýsymnyń sońynda anyqtalǵan. "Deltanyń" juqpalyǵy joǵary jáne ol aýyr halge jyldamyraq túsiredi. Bastapqy varianttardyń inkýbatsiialyq merzimi eki apta bolsa, munyki bir apta shamasynda.
Indet bastalǵaly KVI+ sanaty boiynsha barlyǵy 694 476 naýqas tirkelgen. Resmi statistika boiynsha, onyń 7652-si qaitys bolǵan. Bilik bul tizimge koronavirýs juqtyrǵan, biraq ózge aýrýdan qaitys boldy degen 2,3 myńnan astam adamdy qospai otyr.
Úkimet "kovidtektes pnevmoniia" esebin byltyr 1 tamyzda bastaǵan. Sodan beri pnevmoniianyń bul túrimen 65 765 naýqas tirkelgen, 4073 adam qaitys bolǵan.
16 tamyzdaǵy málimet boiynsha, elde 120 myńǵa jýyq adam koronavirýs infektsiiasynan emdelip jatyr.
Olardyń arasynda 31 910 patsient statsionarda, 87 637 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
• 1 937 adamnyń jaǵdaiy aýyr,
• 507 patsienttiń jaǵdaiy óte aýyr,
• 228 naýqas jasandy tynys alý apparatyna qosylǵan.
Densaýlyq mamandary qazir qoldanysta bar vaktsinalardyń "deltany" juqtyrýdan tolyq qorǵai almasa da, aýyr halge túsýden qorǵaitynyn aitady. Vaktsinalaý naýqanyn 1 aqpanda bastaǵan Qazaqstanda osy kúnge deiin 6,1 millionǵa jýyq adam birinshi komponentin alyp, 4,7 million adam ekpeni tolyq alǵan.
Amerikalyq Djons Hopkins ýniversitetiniń dereginshe, koronavirýsty álem boiynsha kemi 207 million adam juqtyrǵan. Onyń 4,3 milliony kóz jumǵan.
