Eń tómengi temperatýra 1931 jyly 8 qańtarda Shyǵys Qazaqstan oblysynyń Orlov aýylynda tirkeldi. Sol kezde termometr 54,2 gradýs aiazdy kórsetken.
Qazaqstan tarihyndaǵy eń jańbyrly kún - 2003 jyldyń 12 shildesi. Almaty oblysyndaǵy Alǵazy aralynda birden 106,1 millimetr jaýyn-shashyn jaýǵan.
Qazaqstandaǵy eń jaýyn-shashyndy jer - Almatydaǵy Kamenskoe ústirti. 2016 jyly onda jylyna 1300 millimetr jańbyr jaýǵan.
Biraq eń qurǵaq jer dep Qyzylorda oblysyndaǵy Uialyny aitýǵa bolady. Onda 1997 jyly jyl boiyna nebári 7 millimetr jaýyn-shashyn tirkelse, jylyna orta eseppen 64 millimetr jaýyn-shashyn jaýady.
Elimizdiń tarihyndaǵy eń kóp qar 1986 jyly 6 jeltoqsanda Túrkistan oblysynyń Ashysai aýylyna - kúnine 133,6 millimetr jaýdy.
Qazaqstan qatty jelmen de belgili. Eń kúshti daýyl 1974 jyly 25 naýryzda Almaty oblysynyń Jalańashkólinde tirkelgen. Jel jyldamdyǵy sekýndyna 70 metrge deiin jetken.
Qazaqstan tarihyndaǵy eń úlken burshaq 2002 jyly 7 mamyrda Qyzylorda oblysynyń Shieli aýdanynda jaýǵan. Bir burshaqtyń mólsheri 50 millimetr boldy.
Buǵan deiin Oral turǵyndary kólemi úlken burshaq jaýǵanyn videoǵa túsirgen bolatyn. Bul video 2021 jyldyń 21 mamyrynda túsirildi.
Eske salaiyq, jahandyq klimattyq ózgerister Qazaqstanǵa da áser ete bastady. Klimatologtardyń pikirinshe, basty sebep - jer betindegi ortasha temperatýranyń joǵarylaýy. Sondyqtan bizdiń óńirge tán emes tornadolar, shańdy daýyldar turyp, úlken burshaq jaýa bastady. Bul týraly BUU Damý baǵdarlamasynyń Qazaqstandaǵy klimat boiynsha jobalarynyń bas tehnikalyq keńesshisi Sáýlet Sákenov málimdedi.
