385 myń oqýshyǵa bilim berý qorynan kómek kórsetilýi tiis. Bul týraly búgin Úkimet otyrysynda QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Áleýmettik turǵydan osal toptaǵy balalar kontingenti boljammen 385 myńdy quraidy. Olarǵa jalpy bilim berý qorynan kiim-keshek, keńse zattaryn satyp alýǵa kómek kórsetilýi tiis. Ol úshin jergilikti biýdjetten arnaiy qarjy bólindi. Biraq, Atyraý oblysynda áleýmettik turǵydan osal otbasylardan shyqqan balalarǵa materialdyq kómek kórsetýge bólingen qarjy kólemi azaidy jáne birkelki bólinbegen. Qazir osy jumyspen ainalysyp jatyrmyz», - dedi Ashat Aimaǵambetov.
Ministrdiń dereginshe, 31 myńnan astam bala avtobýspen tasymaldaýdy qajet etedi. Mektepterde tasymaldaýdy uiymdastyrý úshin 1 myńnan astam avtobýs bar. Avtobýs parki 454 birlikke jańartylǵan.
«Mektepterdi avtobýstarmen qamtamasyz etý boiynsha arnaýly jol kartasy bekitildi. Lizing arqyly 515 jańa avtobýs satyp alý josparlanǵan», - dedi ol.
