Qazaqstanda 10 myńnan asa balabaqshaǵa 906 myńǵa jýyq bala barady. Bul týraly Finprom.kz habarlady.
Zertteý málimetine súiensek, mektepke deiin tárbie men bilim berý salasynda kórsetilgen qyzmet kólemi osy jyldyń qańtar-naýryz ailarynda 105,6 mlrd teńgege jetken. Jyldyq ósim 24,6 paiyzdy quraǵan. Odan bólek bilim berý salasynda kórsetilgen qyzmet kólemi 29,5 paiyzǵa artyp, 655,1 mlrd teńgeni kórsetken. Al mektepke deiingi bilim berý qyzmetiniń úlesi 16,8 paiyzdan 16,1 paiyzǵa azaiǵan.
Bilim jáne ǵylym ministrliginiń málimetinshe 2020 jyldyń shilde aiy boiynsha elimizde 10,7 myń balabaqsha bar. Onda 97 myń pedagog eńbek etedi. 906 myńǵa jýyq bala balabaqshaǵa barady. Olardyń 40,6 paiyzy – jeke balabaqshalar. 1-6 jas aralyǵyndaǵy balalardy mektepke deiingi bilimmen qamtý kórsetkishi 78 paiyzdy, al 3-6 jas aralyǵyndaǵy balalardy mektepke deiingi bilimmen qamtý kórsetkishi 98 paiyzdy quraidy.
Al karantin ýaqytynda balabaqshalar tárbielenýshilerdi tek kezekshi toptar boiynsha, iaǵni 15 baladan artyq qabyldamaidy.
«2020 jyldyń alǵashqy toqsany boiynsha Qazaqstanda óńirlerdiń ishinde mektepke deiingi tárbie men bilim berý salasynda eń kóp qyzmet Túrkistan oblysynda kórsetiledi (14,1 mlrd teńge). Onyń izinshe Almaty qalasy (10,5 mlrd teńge) men Jambyl oblysy (9,1 mlrd teńge) tur. Bul salada jyldyq ósim Qazaqstannyń 17 óńirinde de baiqalǵan», - delingen habarlamada.
