Qazaqstan zańnamasyna «dinge senbeitinder quqyǵy» túsinigin engizý josparlanýda. Bul týraly QR Aqparat jáne qoǵamdyq damý ministrligi din isteri komitetiniń tóraǵasy Erjan Núkejanov aityp berdi, dep habarlaidy QazAqparat.
«2017 jyly burynǵy Din isteri jáne azamattyq qoǵam ministrligi deister men ateisterdiń quqyqtaryn qorǵaý týraly zań jobasyn bastaýǵa tyrysty. Qazirgi ýaqytta osy zańdy engizý nemese ázirleý boiynsha jumys júrgizilip jatyr ma?», - degen suraq qoiyldy Ortalyq kommýnikatsiialar qyzmetindegi baspasóz máslihatynda.
«Buǵan deiin óz baiandamamda dinge senetinderdiń de, senbeitinderdiń de quqyqtaryn tolyq qamtamasyz etýge tyrysatynymyzdy aittym. Osyǵan bailanysty biz álemdik tájiribege súiene otyryp, naqty túzetýler aiasynda «dinge senbeitinder quqyǵy» túsinigin engizgimiz keledi. Iaǵni, qazir «dinge senetinder quqyǵy» bar, sonymen birge «dinge senbeitinder quqyǵyn» da engizgimiz keledi», - dep jaýap berdi Núkejanov.
Ol Qazaqstannyń zaiyrly memleket ekenin jáne dinge, konfessiiaǵa, etnosqa qaramastan zań bárinen joǵary turatynyn atap ótti.
«Biz osyǵan umtylamyz jáne zań oryndalady», - dedi Núkejanov.
