2 tamyzda Qazaqstanda 149 adam koronavirýstan qaitys boldy. Indet bastalǵaly beri bir kúnde osynsha kóp adam ólimi tirkelmegen. Densaýlyq saqtaý ministrliginiń málimetinshe, 125 adam – koronavirýstan, 24 adam koronavirýs pnevmoniiasynan kóz jumǵan.
Sársenbi kúni koronavirýs juqtyrǵandar taǵy shamamen 8 myń naýqasqa kóbeigeni belgili boldy. 7519 adamnyń koronavirýs testi oń shyqqan. 471 adamǵa koronavirýs pnevmoniiasy daignozy qoiylǵan.
Seisenbi kúni Nur-Sultanda – 1351, Almatyda – 1558, Shymkentte – 502, Qaraǵandy oblysynda – 895, Atyraý oblysynda 381 adamnan koronavirýs anyqtalǵan. Bir kúnde anyqtalatyn naýqastardyń 60 paiyzdan astamy osy úsh qala men eki oblys úlesinde. Sońǵy málimet boiynsha, Aqtóbe oblysynda (365) da virýs juqtyrǵandar kóbeigen.
Sársenbi kúni Túrkistan oblysy koronavirýstyń taraýy boiynsha "sary aimaqtan" "jasyl aimaqqa" oraldy. Qalǵan oblystar men qalalar "qyzyl aimaqta" tur.
2020 jyldyń naýryz aiynan beri Qazaqstanda 602 myń adamnyń koronavirýs testi oń kórsetken. 6227-i qaitys bolǵan.
Qazaqstan biligi pnevmoniianyń koronavirýsqa uqsas túrin 2020 jyldyń tamyzynan beri eseptep keledi. Sodan beri 61 myń adamǵa sondai diagnoz qoiylǵan, 3781-i qaitys bolǵan.
Keibir sarapshylar Qazaqstan biligi taratqan koronavirýs boiynsha resmi málimetke kúmánmen qaraidy. Olardyń pikirinshe, bilik koronavirýs statistikasyn azaityp kórsetýge tyrysady nemese "koronavirýs pnevmoniiasy" siiaqty bólip-jaryp, málimetti burmalaýǵa tyrysady. Bilik mundai aiyptaýlardy joqqa shyǵarǵan.
Densaýlyq saqtaý ministrliginiń málimetinshe, qazir 107 016 adam koronavirýs infektsiiasynan (–103 986 + jáne 3 030 KVI-) emdelip jatyr. Olardyń ishinde 29 325 patsient statsionarda, 77 691 naýqas ambýlatoriialyq deńgeide em qabyldap júr.
KVI+, KVI- shaldyqqandardyń arasynda:
1 786 adamnyń jaǵdaiy aýyr,
412 patsienttiń jaǵdaiy óte aýyr,
209 naýqas ÓJJ apparatynda jatyr.
Ministrliktiń málimetinshe, qazir infektsiialyq aýrýhanalardaǵy oryndardyń – 54 paiyzy, reanimatsiialyq oryndardyń 44 paiyzy bos emes.
Resmi málimet boiynsha, Qazaqstan halqynyń 30 paiyzǵa jýyǵy koronavirýsqa qarsy vaktsinanyń eki dozasyn alǵan: 4 mln adamǵa eki dozasy salynǵan, 1,6 mln adam bir dozasyn alǵan.
Djons Hopkins ýniversitetiniń málimetinshe, Qazaqstan álemde koronavirýs juqtyrǵandar boiynsha (656 myń naýqas) 42-orynda tur. Postsovettik keńistikte Qazaqstannyń aldynda tek Ýkraina (2,3 mln) men Resei (6,2 mln) ǵana bar.
