Bilim jáne ǵylym ministrliginiń tapsyrmasy boiynsha Ulttyq biotehnologiia ortalyǵy men Biologiialyq qaýipsizdik problemalarynyń ǵylymi-zertteý institýty birlesip, COVID-19 koronavirýsyna qarsy vaktsina ázirleýge kiristi, dep habarlaidy "Ult aqparat" coronavirus2020.kz saityna silteme jasap.
«Bizdiń uiymdarda jinaqtalǵan tájiribe barshylyq. Zamanǵa sai ǵylymi baza da bar. Óndiris tehnologiialaryn damytyp, synaqtan ótkizip, sheteldik balamalardan tiimdiligi kem túspeitin otandyq dári-dármekti ázirleitin mamandar jumys isteidi», - dep málim etti QR BǴM Biologiialyq qaýipsizdik problemalarynyń ǵylymi-zertteý institýtynan.
Máselen, qańtar aiynyń sońynda Ulttyq biotehnologiia ortalyǵynyń ǵalymdary COVID-19 koronavirýsyn 6 kúnniń ishinde anyqtaityn test júiesin oilap tapqan. Qazaqstandyq test júiesiniń tiimdiligi men ótkir sezimtaldyǵy reseilik jáne qytailyq diagnostikalyq diagnostikýmdardan kem emestigi anyqtalǵan.
Bilim jáne ǵylym ministrligi Ǵylym komitetiniń «Biologiialyq qaýipsizdik máseleleri jónindegi ǵylymi-zertteý institýty» (Jambyl oblysy, Otar kenti) qus pen dońyz tumaýyna qarsy vaktsinalardy jasap shyǵarǵan. Qurylǵaly 60 jyldyń ishinde institýt bioqaýipsizdik, biotehnologiia, virýsologiia, mikrobiologiia jáne immýnologiia salasynda úlken tájiribe jinaqtady. Institýt ǵalymdary dári-dármektiń 60-tan astam túrin, sonyń ishinde 30 vaktsinany, 16 synaq júiesin jáne 15-ten astam túrli biologiialyq ónimdi jasap shyǵardy. Bul institýtta virýstardyń genetikalyq kitaphanasynyń biregei derekqory bar.
Vaktsinalardy damytý baǵdarlamasy aiasynda biotehnologiialyq jáne gendik injeneriianyń aldyńǵy qatarly ádisterin qoldana otyryp, 5 kandidattyq vaktsina jasalady. Uqsas tehnologiialardy vaktsinalar jasaý salasynda álemdik kóshbasshylar qoldanady. Kandidattyq vaktsinalardyń bes túriniń ishinen klinikalyq zertteýlerdi júrgizýge arnalǵan eń tiimdi jáne tehnologiialyq turǵyda jetildirilgen vaktsina tańdap alynady.
«Álemniń kóptegen eli ózderiniń vaktsinalaryn ázirlep shyǵarǵanyn jariialady. Alaida munyń bári klinikalyq zertteýdi qajet etip, jumys bir jyldan keiin aiaqtalady. Vaktsinany qabyldaǵanǵa deiin COVID-19 virýsynyń taralýynyń aldyn alý qajet. Áitse de bul tek memleket qabyldaǵan sharalarǵa ǵana emes, sonymen birge ár adamǵa da bailanysty. Sondyqtan barlyq aldyn-alý sharasyn saqtaý qajet», - dep tolyqtyrdy ǵylymi-zertteý institýtynan.
Qosymsha suraqtar týyndaǵan jaǵdaida institýt basshylaryna habarlasýǵa bolady:
Ramanqulov Erlan Mirhaidaruly +77770111525 (Nur-Sultan qalasy)
Zákáriia Kúnsulý Daltonqyzy +77015364781 (Jambyl oblysy Otar kenti).
