Halyqaralyq Túrki akademiiasy (TWESCO) ázirlegen túrki álemine ortaq tarih oqýlyǵy mektep baǵdarlamasyna tańdamaly pán retinde engizildi. Bul týraly Astanadaǵy ótip jatqan «Ortaq túrki ádebieti» oqýlyǵynyń talqylaý jiynynda TWESCO prezidenti Darhan Qydyráli málim etti, dep habarlaidy QazAqparat tilshisi.
«Memleket basshylarymyzdyń tapsyrmasy boiynsha biz - Halyqaralyq Túrki akademiiasy birneshe jobany qolǵa alǵanbyz. Sonyń biri - «Ortaq túrki ádebieti» oqýlyǵy. Otyrysty bastamai turyp sizdermen bir jaqsy habardy bóliskim kelip otyr. Taiaýda ǵana túrki álemine ortaq tarih oqýlyǵyn ázirlep bitkenbiz. Túrkiia Bilim ministrliginen bizge hat keldi. Túrkiia Bilim ministrligi biz daiyndaǵan oqýlyqty Túrkiiada tańdaýly pán retinde biyldan bastap kirgizip otyr eken», - dedi TWESCO basshysy.
Darhan Qydyráliniń aitýynsha, Halyqaralyq Túrki akademiiasy úshin bul zor qýanysh.
«Atalmysh oqýlyq Qazaqstandaǵy Nazarbaev Ziiatkerlik mektepterinde oqytyla bastaǵan. Endigi kezekte Túrkiia mektepterine de engizilip otyr. Bizdiń paiymdaýymyzsha, Sammitte (Túrki tildes elderdiń sammiti - avt.) sheshim qabyldanǵan jaǵdaida Qyrǵyzstan, Ázerbaijan jáne Qazaqstandaǵy barlyq mektepterge osy Akademiia ázirlegen oqýlyq engiziletin bolady degen úmittemiz», - dedi Darhan Qydyráli.
Aita ketsek, Beibitshilik jáne Kelisim saraiynda ótip jatqan ortaq oqýlyqty talqylaý jiynyna birneshe túrki tildes elderdiń ókilderi qatysyp otyr. Atap aitqanda, ortaq oqýlyqty talqylaý úshin Ázerbaijan memlekettik pedagogikalyq ýniversitettiń dotsenti Bilál Hasanov, Qyrǵyz Respýblikasy UǴA múshesi, Halyqaralyq qyrǵyz-túrik «Manas» ýniversiteti Shyǵys tilderi bóliminiń meńgerýshisi Osmanakýn Ibraimov, Túrkiia Respýblikasy Ulttyq bilim berý ministrligi Eýropa Odaǵy jáne syrtqy bailanystar departamentiniń direktory Ilhan Aksoi kelgen.
